上個星期個市，雖然波動中顯出生機，但成交持續低企，實則暗藏殺機，喺傳統智慧下，如果個市升上嚟無成交配合，就會愈快見頂。睇嚟今次個市升到咁高，要回落去嘅時候會有好多散戶走唔切，各位記住小心。
喺前一排公布頭3季業績嘅康師傅（322），業績非常唔錯，盈利比舊年升咗8成有多，由於市場預咗個業績會好靚，個價更喺公布前最多曾升至2.3元。不過個價喺公布後持續回落，上個禮拜原本可以升番穿條下降阻力線，形成轉勢，但當升返上2蚊時，隻股仔就好似無乜力咁，重有好幾個大號碼嘅經紀行喺度力沽。
伏勝聽啲大行朋友講，話有個歐洲盤喺度做緊換馬行動，個盤雖然唔係太大，但都好襟沽。不過個朋友話，呢個沽盤係個限價盤嚟嘅，以1.90元為底線，而且亦見到有班人喺度維持秩序，個價始終都會番返2蚊樓上。假如個價真係靠近1.90元，不妨買番啲，隨時可能食到即日鮮。
另一隻喺上個禮拜一先至上市嘅美蘭機場（357），上個星期升到去4.175元後，就好似無晒後着咁，一口氣咁跌返落嚟，星期四個價重更加以跌到落去3.825元。不過，星期五又有番啲買盤入市，以4元報收。據市場傳聞，話有一筆為數幾億嘅國內資金會喺呢兩個星期調入港股，目標更加係直指呢隻有海南省概念嘅美蘭機場，班大戶經過過去一個禮拜嘅收集，聽講可以隨時起步，短期目標價係4.5元。有個大戶話由於海南省喺發展旅遊方面大灑金錢，美蘭之後可能隨時有啲新路向會公布，大家不妨多加留意喎。
伏勝