7歲的HiFi，短短3年間威盡犬隻比賽場地，囊括共18個服從競技獎項，甚至贏過唔少警犬，更獲漁護署豁免拖繩出街的牌照，出街可以唔使拖。主人叫佢Stay，無論你點騷擾，佢亦一動也不動成個鐘，直至主人話Finish，比人重聽教聽話。但有誰又想到小時候的HiFi竟是個體弱多病的小藥煲？
記者：吳佩璇 攝影：陳盛臣
年齡：7歲
性別：男
品種：金毛尋回犬
家庭狀況：有隻3歲邊界牧羊犬妹妹Dolby
1.BB狗「No」&「Come」
好多BB狗都鍾意咬嘢，所以有人在家時才將牠放出來，牠一咬嘢就叫「No」，讓牠慢慢明白主人指示；若要牠走過來時可叫「Come」。只要識聽「No」&「Come」，遇有打交或攻擊人時，牠自會受令於人，識得停或走開。
2.餵食時落Command
想狗仔學識聽Command，最好是在餵食時，放下狗糧後示意牠不准食，直至主人話「Eat」。
3.唔咬家具有條件
唔准狗仔亂咬屋企家具，應先準備其他玩具或狗繩之類作為交換條件。每次狗仔做到預期的動作，亦應加以獎勵。
4.培養互信如伴侶
不要以主從角色進行訓練，而是以Partner身份互相合作。因為一些較難的動作其實要互相配合，彼此信任才能做到。
Decky從HiFi兩、三個月大買回來開始，一直都發覺牠不太願意進食：「好味啲嘅好似雞肉、罐頭，用手慢慢餵佢，佢至肯食；又容易攰，但一有其他BB狗同佢玩，又即刻醒晒。」後來才知牠患了慢性肝病，須每日服2次藥，每次5、6粒，半年後HiFi終於治愈。
然而，肝病醫好了不到3個月，HiFi又開始暴瘦，小便顏色亦好古怪。一次覆診時又發現牠血中毒！結果又要食藥兩個月。由BB仔到歲幾大，HiFi都是揹住藥煲做狗的！
這段日子，HiFi天天吃藥，吃到牠怕怕，牠竟蠱惑地作狀舔晒脷把藥吞下，趁Decky擰轉背，才將藥丸吐出，並楔在地氈或枱底，以為神不知鬼不覺，結果被Decky掃地時揭穿！自此Decky就用芝士將藥丸包起，HiFi才肯乖乖食藥。但說到每次抽血，HiFi都會大力掙扎，於是醫生想出把針嘴拔掉，作狀用針筒拮牠，讓牠錯覺打針不會痛。誰知聰明的HiFi完全分得出哪針是真哪針是假。假的牠會乖乖就範，真的打針牠仍會拼命掙扎。搞到醫生同Decky頭都大埋！
雖則體弱多病，但仍難掩天賦靈巧的運動細胞。99年1月，朋友帶狗仔參加狗兒天才表演賽，叫埋Decky齊齊玩。陪太子讀書的HiFi，卻因平日跑慣步跳慣欄，在沒有訓練下竟拿了個亞軍！自此，Decky便正式跟師傅學培訓狗隻，3年來HiFi共囊括大大小小18個服從獎。最巴閉的，要數「2000年香港警察警犬隊巡邏犬周年服從比賽」，與受過嚴格訓練的懲教犬一較長短，結果於邀請盃中勇奪亞軍。同年，又考獲漁護署豁免狗隻拖繩出街的牌照，成為第一批攞正牌，出街唔使拖、又乖又聽話的狗隻。
舊年逛公園時，HiFi無故遭一頭都柏文噬傷左後足！又鋼針又鐵線，單是藥費已要兩萬多，但幸好HiFi沒因此跛足，醫了半年，終將斷骨位接駁好。只是住舊唐樓的Decky每日要抱住60幾磅的HiFi走5層樓梯！但Decky卻又有另一番體會：「佢細個又多病，又斷過腳，有咁多經歷嘅狗特別有性，訓練時好快就能達到要求。」這或許解釋了HiFi何以這麼聽教聽話。