行姐陳彥行同鄧兆尊自從合作拍《皆大歡喜》之後就傳緋聞，佢兩個雖然都否認戀情，不過時不時都會攞對方嚟講。
好似早排中秋節，兆尊就同記者講話自己最掛住嘅人係行姐，而行姐就提議兆尊不如去搞基，究竟佢兩個係咪拍拖，馮仁昭就唔知，不過感情就真係好好。
前晚大約十點，行姐、兆尊就一齊去跑馬地源遠街嘅金記飯店食飯，同行嘅重有趙學而、謝天華。行姐同趙學而、梅小惠同林漪娸喺台慶嗰晚攞咗「我最喜愛的拍檔（戲劇組）」嘅獎項，但今次食飯就得其中兩個靚女出席，梅小惠同趙學而唔啱係人都知，所以冇梅小惠份都好正常。
記者見到佢哋嗰陣，佢哋啱啱食飽離開，行姐同趙學而攞住一袋二袋，另外，重將食唔晒嘅嘢打包拎走，呢啲就係「金家」女人嘅慳儉美德，大家都要學吓！
楊千嬅日前拍百老匯廣告，去其中一間百老匯分店取景，佢話：「平時都唔得閒去行街，嗰日我見到好多新嘅電器產品，可惜唔可以買晒番屋企。」有報道話佢搶Twins飯碗，千嬅話：「我都好欣賞Twins，而且百老匯咁大間公司，有咁多客戶，大家吸納嘅客戶都唔同，都冇影響。」
張衞健主演嘅《齊天大聖孫悟空》收視高企，佢會趁勢幫隻同名唱片宣傳，準備聽日喺旺角搞簽名會，預計實有好多馬騮迷去捧場，到時頭一百個排隊攞簽名嘅歌迷，重可以獲贈孫悟空馬騮公仔一個，之後一百個就有海報。
為免秩序大亂，唱片公司預先知會警方，重斥資請咗十二個保鑣護駕。
劉德華早前拜咗變臉大師彭登懷為師。噚日有內地報章話華仔已經正式成為四川省川劇學校嘅註冊學生，佢喺下個月初就會去成都學藝，而嗰間學院重專登成立一個教師組嚟訓練華仔㖭！報道又話內地文藝圈名人儲成炎教授，會為華仔作首叫《鑄成傳世美天王》嘅詩。華仔同彭登懷將首詩譜成曲，佢遲啲會為首歌拍MV，喺入面變臉喎！
小雪噚日去到商台接受訪問，前日有本雜誌話關心妍得寵，可以陪住老闆一齊去睇演唱會。小雪解釋話自己當日要去揀唱片封面嘅相，所以就去唔到，佢重強調老闆都有邀請佢去。另外，小雪指自己從來都冇妒忌關心妍，因為佢始終都係新人，所以公司一定會力捧佢。
楊恭如早排俾人影到佢同富商朋友周正毅食飯嘅相之後，近呢幾日都冇再出嚟，不過噚日佢同阿媽就喺機場出現。戴住副黑超嘅佢離遠見到記者，即刻頭耷耷，同阿媽衝入閘，在場記者叫極佢都聽唔到。𠵱照時間表，佢應該都係返上海老家，唔知周正毅會唔會又咁啱喺上海呢？