曼聯球星碧咸（DavidBeckham）嘅老婆Victoria同兩個囝囝，早排差啲俾人標參，搞到兩公婆鬼咁擔心一家人嘅安全。最近我羅拉八到新料，話佢哋已經將屋企三架寶馬全面強化，經過改裝之後，聲稱堅到好似占士邦啲座駕咁，可以抵擋炸彈同火箭炮！
𠵱家碧咸一家有三架寶馬，老婆Victoria嗰架係750i，經過改裝之後，價值超過二十五萬英鎊（約三百萬港元），而碧咸同佢哋嘅保鑣，就分別以防彈540i同X5四驅車代步。三部車啲裝備勁到我大口羅拉都唔係好相信，特別係Victoria嗰架750i，唔單止喺車尾加咗啲攝影機，可以睇清楚後面有冇可疑車輛，重裝埋防彈玻璃同重裝甲，就算受到炸彈同火箭炮襲擊都冇有怕。
寶馬出咗名係世界知名嘅安全名車，所以深得唔少富貴同政界人士選用，𠵱家碧咸屋企「三隻馬」總值四十五萬英鎊（約五百五十五萬港元），唔知啲人會唔會反而轉打三部車嘅主意呢？