美股大升，港股未跟得貼，可能驚住美股急升後有回吐，恒指升破1萬點後有啲壓力，全日只有61點進帳。
4大地產股叫做隻隻升，恒地（012）波幅比較大少少，最高27.75元，最低27.15元，但都只係2.2%咁大把，收27.45元，升1格。恒地自從宣布私有化恒發（097）之後，穩步向上，每次低跌之後，都有維持秩序隊伍出場，近期差唔多冇1日係最低價收市。恒地一兩日間嘅短時間內，波幅始終好細，吼中價位買賣，都所賺有限。恒地Call輪9473，則因有槓桿效應，波幅較大，可以諗吓低買高賣，昨日最高23.5仙，最低21.1仙，收22.2仙。明年3月夠鐘，溢價6%，槓桿率12.4倍，日中炒上炒落，可以搵餐茶，日日幾十球交易，易買易賣。
大藍籌中，九倉（004）叻少少，收16.15元，升25仙。九倉緩步跑，個勢向上，有隻九倉Call輪9476數據唔錯，可以吼吓，隻輪明年6月到期，溢價3.3%，槓桿率5.8倍。
恒生（011）收86.50元，只升25仙，滙豐（005）收91元，升夠75仙。大市輪流發展，滙豐距8月高位只有75仙，恒生則仍低3元，恒生上升空間大啲。昨日所提嘅恒生Call輪9402，最高40仙，收37.5仙，升2.5仙，槓桿率23.1倍，爆炸力強勁，揸耐啲，回報唔錯。
章盛