電腦專題：
土生土長IT人逛盡上海5大蒲點

喺香港，買電腦可以去黃金或者旺角電腦中心，睇手機就通常蒲先達同落鴨記，去到上海，又有何地方可以逛？初次踏足上海的我，有幸得到當地土生土長兼工作的IT人作為盲公竹，逛盡舖頭最多、產品種類最齊、人氣最旺的電腦手機場。
記者、攝影：招佩珊

陳力小檔案：
年齡：28
貫籍：上海
職業：Hdt互動通客戶部經理，公司從事網頁設計及為客戶提供解決方案
IT用品：SonyVAIONotebook、iPAQPocketPC、西門子3568i手機

原來喺上海只要去一個商場就可以買齊電腦、手機及AV產品，好似陳力帶我去的太平洋數碼廣場、百腦匯及賽博數碼廣場呢3個熱門腦場，通常有3、4層賣電腦，1至2層搵到AV產品，當中有一層專攻手機，買齊所有IT產品都唔使四圍走。

蒲點1：層數最多瓣數最齊太平洋數碼廣場
計埋地庫及地下整個廣場合共有7層，6層賣電腦產品，而且分得好清楚，地庫賣軟件、地下Notebook、睇品牌如IBM、Acer去1/F，砌機就佔3層之多，當我忙着收傳單時，陳力解畫：「這3層全是DIY店舖，競爭當然大，現在大部份家用家都是DIY，比較便宜嘛！」
喺香港見到的手機型號呢度都有齊，不過就特別多金色機，金色西門子6618及SonyEricssonT600你又見過未？

地址：肇嘉濱路1117號

蒲點2：室內寬敞行得至輕鬆百腦匯
行過幾步就是另一個熱點百腦匯，是最有名的電腦大場。由於只佔整座購物城的數層，店舖數量及產品種類比太平洋略為遜色，但勝在夠闊落，唔使好似喺太平洋咁人碰人。

地址：漕溪北路11號美羅城B1-3/F

蒲點3：連鎖式商場分店最多賽博數碼廣場
論人流、舖頭數目、爆場程度賽博唔及其餘兩個熱點，反而陳力經常嚟呢度，因為公司喺附近。賽博數碼廣場是3C（電腦、通訊及家電）產品的連鎖賣場，直至今年年中就有14間分店遍布中國，而呢間位於淮海中路的是旗艦店，怪唔知陳力話：「浦東一樣有，可是這裏最大。」

地址：淮海中路282號

蒲點4：浦東至新腦場正大廣場
現時上海最大的商場正大廣場剛剛新開張，頂樓設有電腦及手機專賣區，約六、七十個舖位，半數仍空置，可能陳力見我有點失望，於是即刻帶我去到4樓數碼夢想街，即是Sony數碼旗艦店，精神的確為之一振，因為大部份Sony新舊數碼產品都可以試到、玩到、買到。

地址：陸家嘴西路168號頂樓

蒲點5：上網打機網Bar至Hit
原來上海InternetCafe並不普及，「受到監管的NetBar最多，但合年少一輩，我喜歡有WirelessLAN的CafeShop，喝杯咖啡，上上網。」他最喜歡的CafeShop是浦東的STARBUCKS。