北上雜誌:<br>北上扮靚歎番晚平貴兩面睇

北上雜誌:
北上扮靚歎番晚平貴兩面睇

到深圳唔去足浴揼骨,好似未真真正正享受過深圳的地道風味,不過根據我嘅實地考察加上多年經驗,師奶團通常日頭去東門Shopping,夜晚又要去食奇珍補品,要歎足浴揼骨,真係唔係好夠時間。若唔介意喺深圳過一晚夜的話,不妨等我介紹兩間美容中心,一間讓你感受豪華的五星級服務,另一間則以超值實惠為賣點。
記者:歐嘉荃
攝影:陳良

高檔
游水睇煙花
去到酒店已經係夜晚八點幾,入到二樓嘅水療中心,Eva二話不說就要去戶外泳池游番幾個塘,我惟有奉陪到底,泳池有成2萬幾呎,夜晚無乜燈光,感覺豪華但唔算有氣勢,原來每逢星期五及星期六,夜晚八點四十五分左右,泳池對開嘅世界之窗都會放煙花,「雖然只係短短幾分鐘,但場面都算壯觀,咁樣睇煙花都係第一次。」Eva興奮地說。不過呢排天氣咁凍,我就建議各位稍移玉步去室內泳池,隔住塊玻璃睇,起碼唔會食西北風咁慘。

Eva檔案
職業:Model及演員
推介:?1,180水療套餐

?1,180水療連雙人房套餐
呢度平日只招待會員及酒店住客,入會費每人要?13,000,而且重要畀年費?7,800!每個療程都最少要?320,絕非一般深圳市民所能消費得起。最近佢哋推出了一個Package,除咗包雙人房一晚,重有一個半小時嘅水療療程。離開香港,又有五星級酒店套房住,感覺特別Relax。我哋特別邀請識享受嘅Eva玩番晚,睇吓佢有乜嘢評價。

30分鐘全身享受
Eva最欣賞係水療中心嘅深層保濕身體護理,浴缸附有300多個水壓氣孔,氣孔噴出嘅氣流可促進淋巴同血液循環,功效同做運動一樣,可以刺激同破壞體內嘅脂肪,感覺就好似幾十個人同時幫你按摩一樣,「服務員重幫我按摩埋頭部,真係好舒服!」
原價:?320/30分鐘
時間:10:00am-10:00pm

五星級雙人房
普通雙人房的環境舒適,因開業只有一年的關係,設備與裝修都非常新淨,每個房間都備有29吋遙控電視可接收國際衞星頻道。
原價:每晚?1,500

Vbar營業到凌晨
酒店內的Vbar,營業到凌晨兩點,每晚都有LiveBand演出,Coaktail每杯?40至?50,住客享有8折優惠。

威尼斯酒店聖莎薰健身水療美體中心
電話:(86)75526936888
地址:深圳華僑城深南大道9026號
交通:羅湖關口坐的士約?50。

超值
?66皇帝足浴歎足80分鐘
想平平哋歎吓世界一樣無問題,我喺黃昏嘅非繁忙時間去到呢間24小時的美容中心,見到舖內差不多坐咗七、八成人,而且大部份係港客。呢度嘅裝修雖然較為普通,不過最出名就係皇宮足浴,碰啱撞到一個香港嚟嘅莫太,佢每個星期都會嚟幫襯,一於問吓佢嘅正斗推介。


按摩轆好舒服
我見莫太將雙腳放喺一個高身木桶入面,上面再冚條毛巾,莫太話:「木桶入面有兩層,最底已加入玫瑰蘆薈精華嘅中藥,熱辣辣嘅蒸氣蒸住雙腳,㷫得嚟好舒服。桶入面重有木製按摩器,可以邊焗邊為雙腳按摩。」

敷薑去腳風
當蒸完雙腳之後,就輪到一般嘅腳底按摩,「我最鍾意就係按摩,按完摩重會做埋薑敷,去晒啲腳風,人都輕鬆晒。我就覺得好過傳統嘅腳底按摩,而且幾十蚊嘅價錢都幾抵。」

顧客直擊
港客顧太:「每逢周末都會嚟深圳足浴,覺得呢間手勢唔錯,價錢又平過羅湖商業城嗰邊,但係私家房最大只得4人房,多啲朋友想一齊都唔得。」

東方健姿彩美容美髮中心
電話:(86)75582259052
地址:深圳羅湖區人民南路3018號地下(深房百貨側)
營業時間:24小時
交通:羅湖關口坐的士約?13。