大市唔經唔覺，已經連升9日，但其實呢個升浪，唔可以話有氣勢。第一，恒指由11月12日低位9522起步，到噚日高位10129，升足9日，亦只係上升607點，幅度6.37%；第二，升市亦無動力配合，最多成交一日係上禮拜五的102億元，最小一日係40億元，平均每日63億元。咁嘅成交，升勢好難突破。
美股禮拜四大升，噚日港股僅早段有較強反應外，其他時間都只係牛皮，恒指收市10065，升61點。
大市雖然「慢火煎魚」咁升上萬點大關，但是都要唞一唞，大戶始終要營造氣勢，個市先會大升，10400雖然係初步目標，但估計大戶唔會滿足呢個位，屆時衝破250日線，甚至去到11000大關，一點不奇。
外圍科技股又再上過，半導體股表現最突出，本港嘅亦唔失禮，ASM太平洋（522）收16.5元，升4.4%，品質國際（243）收1.73元，更大升10.2%；科聯（046）同宏昌（061）亦分別有8.8同7.2%進帳。
品質擁有43%的樂依文，最近一季業績有明顯改善，截至10月止的一季，虧損由前同期的4950萬美元收窄到388萬美元；10月止的半年，虧損6631萬美元，而前同期則蝕6983萬美元。半導體行業低潮已過，品質早前已預期，03年度營業額可增1倍，回復高峯期的6至7成。品質噚日大升，終擺脫3條短期平均線的糾纏，升勢確認，暫時10月23日高位1.79元會有輕微阻力，升破後可見2.0元。
tom.com（8001）重上2字頭，收2.025元，升13.5仙，升幅7.1%。tom早前表示會收購娛樂媒體資產，前日就宣布進軍內地電視及平面廣告代理業務，估計電視相關業務佔集團總收入的比重，明年可逾10%。tom走勢與品質相若，破位而上後，短線阻力為2.15元（10月28日高位），中線目標仍為2.7元。
偉易達（303）在成功突破雙底的頸線（6.9元）阻力後，噚日升上7.9元，完成量度升幅目標後掉頭回落，低收7.55元，下跌0.1元，短線走勢將轉趨反覆，可低吸高沽賺差價。
郭兆誠