美股持續反彈，但港股只升少少，恒指收報10065，升61點咁大把，成交金額更只得63.97億元。講起中國電信（728）重衰，經過朱總點名批評後，一直未好過，再次潛水，收報1.44元，跌1.37%。其實朱總明知香港係敏感之地，其實可以私底下痛斥中電信，唔使鬧到咁出面，搞到一眾捧場客都要受靶。
耀生行（290）昨日玩過山車，股價最低落到去2.85元，大跌21%，但低位有承接，跌幅逐步收窄，結果收3.60元，冇升跌，都算幕後人本事。
據黑客話，聽講隻股早排有人減持，沽下多啲沽下又多啲，股價由高位計已跌足6成。昨日早段沽壓復現，但低位顯見支持，相信係幕後人唔想見到股價跌得太過份，所以臨尾掃高個價收市。不過，一般散戶若想博此股見底反彈，風險唔細，一則隻股街貨甚少，股價升起上嚟好似坐火箭，但跌起上嚟亦可以好快；此外，隻股幾個月前曾以每股5.13元批咗2380萬股出街，股價𠵱家得番3.60元，接貨者唔知會有乜打算。
兆晉國際（491）噚日停牌，據聞話想配股向主要股東收購資產。不過，Cookie話唔好抱太大期望，因為此股現時股權異常分散，公司資產亦唔算吸引，唯一可取是個殼，但由於公司涉及一些法律訴訟，相信唔易賣到個殼，而今次發行新股，亦不會涉及重大股權易手。
有線寬頻（1097）噚日突然勁升10%，據聞話同賭波合法化有關，因為有線幾乎壟斷所有外國足球節目。不過，除非有線可以接受賭波投注，否則有線頂多因為賭波合法化而令客戶人數稍為上升，因為無論賭波合法定非法，租有線電視睇波嘅人數變化都唔會太大。
阿虎