當煤氣、石油氣已經成為家家戶戶必備的燃料時，你會否想到今時今日，還有人在屋企用炭爐，慢慢叠炭透火，用扇撥撥撥來煮嘢食?!用炭爐煮食不經不覺已經有三十多年的周太，雖然細小的廚房備有一個單頭式石油氣爐，但炭爐就有成兩個咁多！只因喜歡煲湯的她，堅信湯水的功效，配合炭爐的火路，能將其心思配搭的湯料發揮得淋漓盡致！
記者：周麗懿 攝影：林栢鈞
示範：上環周氏家庭
問周太為何用炭爐煲湯時，她便由三十多年前說起：「嗰時要湊細路，又要煮飯，有時行開行埋，好難成日睇住個火，如果煲緊湯行開，被大風吹熄或者被滾起嘅湯淋熄咗咪好危險？所以用炭爐嘅好處就係唔使睇火。」
她勢估唔到幾十年前的安全煮食法，竟然會是現今最流行的自殺工具，有次她如常拿着兩袋炭回家時，遇上老街坊關懷地追問：「咦！阿嫂，你無嘢呀嘛，點解買咁多炭呀？做咩事呀？」弄得她哭笑不得。
今時今日仔大女大，周太仍然對炭爐不捨不棄，原來也是為仔女：「炭爐煲出來的湯火候又夠，又入味，飲呢啲湯就最有益健康，仔女做嘢辛苦，煲啖靚湯就最緊要。」
周太會專向賣炭的舖頭訂貨，「啲炭特別大嚿同乾身，好容易起到火，好多要用炭嘅食肆都係同佢哋訂，超巿賣嘅有濕氣好難透火。」
周太話煲湯其實沒有甚麼技巧，反而配搭才考心思，今次這道湯水用上了西施骨和牛鰍魚，她說西施骨比豬骨靚，味道更甜，用來煲湯就最正，而魚則令到湯水更清甜，再加入雪耳等配料，冬天喉嚨「唔聽話」，飲一碗包保潤番晒。
材料：
栗子 12両
紅蘿蔔 1個
粟米 2條
雪耳 5錢
牛鰍魚 11/2斤
西施骨 1斤
果皮 半個
水 4大湯碗
做法：
老公周生：
呢款老火湯我飲足幾十年，好味到連渣都食埋！
除煲幾度拿手靚湯外，周太也喜歡用藥材作配搭煲一些類似涼茶之類的飲品，就算仔女返唔到屋企食飯，都可以夜晚返屋企當水飲。這些藥材配搭各有療效，紫丹參可通心臟血管；山渣能消血脂及減肥；製寄生則有清熱明目的效果，周太說煙酒過多，經常外出食油膩嘢嘅人最啱飲。
材料：
紫丹參 2両
田七 1両
山渣 3両
製寄生 1両
蜜棗 8粒
水 21/2大湯碗
做法：
洗乾淨材料略浸一會，隨凍水放入煲內以中火煲滾。煲約2小時便可，可熱飲或放入雪櫃作凍飲。
家住上環的周太，由舊上環街市、臨時街市，至現在的上環街市，買足三十多年，除了是方便外，還因為與裏面的菜檔、雞檔都是老街坊，買餸之餘還可以和他們「吹吹水」！
鮮雞去肥膏
先到地下的鮮雞檔，周太同這個檔主買慣買熟，一埋到檔位，左揀右揀就買了半隻鮮雞，順便叫檔主幫手起埋肥膏，「𠵱家食嘢要健康啲，先喺呢度切走啲勁肥嘅肥膏，返去再慢慢切走剩低嘅肥肉。」
西施骨靚過豬骨
走上一樓的肉檔，周太諗了諗決定還是買西施骨，因為西施骨比豬骨更靚，肉比較多但又不太肥，乃煲湯之一流材料，檔主還以「友誼價」賣給她，又慳番幾蚊！
靚栗子煲湯
秋風起，見到街頭又出現栗子檔，就知道又是食栗子的季節了。用栗子煲湯可以令到湯水更加清潤清甜，煲過湯的栗子依舊香甜，且沒有炒栗子那麼熱氣。