搭飛機有得儲飛行里數，可以用嚟換機票，原來家陣搭的士都可以享有呢種優惠㗎！喺日本，現時經已有多間中型的士公司，推出咗里程優惠計劃，乘客可按乘搭距離或金額儲起積分，儲夠積分就可以換取唔同金額嘅乘車券。推出呢個優惠計劃，係的士公司希望能在不景氣嘅經濟環境下，保留有固定嘅客源，與大型的士公司競爭；據其中一個以橫濱為基地，並擁有63部的士嘅AsahiTaxi的士公司管理層表示，此計劃嘅成效出乎意料地好，該公司會員超過1,000人，喺里程計劃推出後，每位會員每月乘車次數由2.5次攀升至4.3次。以AsahiTaxi嘅計劃為例，每消費500日圓就可以獲得一分，喺一個月內儲滿60分（即約30,000日圓），便可換取1,000日圓嘅乘車優惠券，如在3個月內則為660日圓，而兩年內儲滿則為500日圓。對於呢類里程優惠計劃，當地嘅大型的士公司則持觀望態度；唔知香港嘅的士公司或司機團體，會否考慮推出呢類里程優惠計劃，去爭取客源呢？