上期《壹週刊》有大劉同新女友行新港中心嘅報道，經紀李睇完即刻有料爆，佢話大劉呢排巡新港巡得好密，租客好容易碰見佢，見到面忍唔住即刻行敬禮。
點解大劉呢排成日微服出巡呢？經紀李話咪因為無印新開張囉，大劉非常關心，得閒就落去睇吓無印生意如何，人流夠唔夠？據地產界消息，原來呢次無印同新港一簽就簽5年租約，屬於大客身份之外，大業主亦寄望無印可帶旺成個商場，再成為區內新熱點。相信成功機會幾大，因為廣東道屬名店區，由尖沙嘴地鐵站行去海港城，必經新港中心，如果個場做得年輕化，啱𡃁仔口味，已輕易截咗一批客。
聽講無印開張後，人流的確旺咗好多，其他租客續新約已紛紛被加租，最少加十個巴仙以上，最近DoublePark亦已續約。睇嚟大劉有意將新港變成街頭型人商場，𠵱家場內大部份舖頭都賣時下街頭牌子衫褲鞋，相信陸續有嚟。經紀李話：「𠵱家啲大老闆好追得上潮流，唔再種意搞埋啲劈價場或用鹹濕三點式女促銷，寧願搞啲高層次嘢，所以經常搵啲街頭牌子合作，希望形象好好睇睇走長線。」果然有理。
主持人：大食Jack
八卦熱報：