城中社交界名人趙世曾，最近一連三晚都喺大會堂劇院出現，但就晚晚都搞到神憎鬼厭。
一群忍無可忍嘅戲迷，噚日向八方投訴，話侯少奎同岳美緹呢班南北崑曲名家，星期二到四嚟香江演出三場，可謂一大盛事，豈料呢位可惡嘅趙公子捧足三場，又破壞足三場。
第一晚，上演緊折子戲《林沖夜奔》，趙公子同女伴遲到行入劇院若無其事坐低，無耐演到第二套折子戲《華容道》，佢兩個竟然大刺刺起身走人，又搵唔到出口兩頭走。第二晚，演全本《玉簪記》，到第四場佢老哥又帶住個女伴大模斯樣入去，發覺個位俾人坐咗，重叫帶位趕人走，你話幾影響戲迷睇戲吖，須知公子有水，買親都係第二行位，全院矚目。
到咗第三晚演《千里送京娘》，正當戲迷求神拜佛希望佢唔好再出現，趙公子又去睇一陣就走。八方知道趙公子一向有鋪怪癮，話自己冇耐性，無論睇演唱會定電影，寧願分開幾日睇，每次都只睇半場。不過好似今次咁完全唔理對其他人造成騷擾，唔通真係有錢大晒？而且咁亦對演出者唔禮貌，趙先生點都算名人，咁簡單嘅道理冇理由唔知。
傳真︰2623-9278
電郵︰