玩玩具唔係小朋友嘅專利，好多玩具迷都係使得起錢嘅成年人。我大口羅拉發現好多日本藝能界名人都情迷玩具同公仔，佢哋喺屋企收埋唔少，直頭係收藏家咁款。
巨乳女星代表酒井若菜，三年前睇完《雪姑七友》後，即刻變咗迪士尼卡通迷，激發佢入咗大量米奇老鼠、唐老鴨同高菲狗嘅布公仔同飾物，最威係佢家姐二十幾年前儲埋嘅絕版迪士尼玩具，都俾若菜據為己有。
而另一位水着偶像平山綾就係小熊維尼狂迷，佢自爆已經儲咗超過二百個維尼公仔，最鍾意嘅就係一個一米高嘅巨型維尼，貪佢好似肥仔咁好攬喎。至於樂隊thebrilliantgreen嘅女主音川瀨智子就最堅，佢可以話係最「濫交」，由《芝麻街》、《寵物小精靈》、《天線得得B》到《飛天小女警》嘅卡通公仔全部都啱！