新地包裝豪宅果然有一手，深明一味介紹個盤有幾靚幾豪，點都唔及畀傳媒親身體驗一吓貴族富豪過嘅生活，咁有感染力。繼上次跑馬地禮頓山入伙，請王仁曼芭蕾舞蹈團嘅小朋友，喺池邊跳舞獻花後，今次寶珊道1號，請嚟全港唯一嘅室樂團，演奏莫扎特小夜曲。所謂「室樂」，係以六人為一組，喺室內進行嘅小型演奏會，屬十七世紀歐洲貴族流行嘅高尚娛樂，一直流傳至今。
聽完音樂之後，重有法國南部四式甜品招呼記者，由經營私房菜嘅法籍女廚師，專誠飛去法國買料，炮製出焗蛋白、杏仁脆片、雪花朱古力同鑽石曲奇，賣相精緻味道含蓄。蘭西有幸兩次都有份出席，禮頓山嗰次，由於事前冇通知有節目安排，感覺較驚喜，印象亦深刻啲。
蘭西噚日收到料，信和今個禮拜日會喺小西灣藍灣半島嘅藍灣廣場，舉辦「信和情傾歐陸聖誕」推廣活動。繼續用番請紅星到場呢個撒手鐧。今次請嚟電視藝員廖碧兒、名模Rosemary、歌手JoeJunior，重有旅遊家李樂詩。信和方面，租務部總經理陳昌傑會出席。
信和已經有一段時間冇開盤，到時要問問陳生有乜計劃先得。另外，信和啱啱食尾胡攞咗九鐵嘅火炭何東樓項目，但九鐵話要到06年至賣樓花，唔知佢哋知唔知有咁嘅限制呢？
有銅鑼灣大地主之稱嘅希慎興業，有意逐步翻新旗下物業，提升質素，同埋將嗰區大變身。希慎營運總監兼董事利子厚講，明年3月率先翻新嘉蘭中心商場（圖四），會增設由停車場直達各層商場嘅電梯，希望吸引多啲人流。
由於個翻新工程係長期計劃，點都會對收入有影響，但利生話物業翻新後，價值同租金可保持甚至提升，不應只着重眼前嘅利益。佢強調最緊要透明度高，同有清晰嘅發展方向。
利生說，由於公司名係HysanDevelopment，有好幾次會見外資機構，佢哋一開口就問希慎賣咗幾多物業，唔知原來係投資收租嘅公司。他笑說，以後要多啲曝光，等多啲人知道佢哋係做乜嘅。
麗新集團名譽主席林百欣發迹地長沙灣百欣大廈，對佢有幾重要，只要睇吓屹立喺大廈入口三十六年，林伯親自題字嘅碑碣就知。
百欣大廈66年9月落成，一直由林伯旗下製衣公司自用，隨着公司生產線全面北移，大廈亦喺舊年底交吉。經過翻新後，最近推出招租，但碑碣仍保留，就憑碑文中「以垂永紀」一語，可知林伯無論幾唔掂都唔會賣。
喺東涌有項目嘅香港興業陳子明認為，市場對呢個社區認識唔太深，所以配合就快推出嘅藍天海岸，準備花費一百萬元搞「百萬招募新思維」活動。活動將會分三個階段進行，目的係想灌輸用新角度去睇未來嘅樂觀態度。昨日記者會送贈古書同太陽眼鏡（圖五）予傳媒，寓意目光可更遠大，思維更遼闊。
蘭西
電郵地址：