天氣一開始轉涼，我又開始心郁郁想食火鍋，早就聽聞深圳有條街雲集了十多間特色的火鍋店，今次上去當然要食番夠本。在眾多火鍋店中，我揀選了兩間由朋友介紹的來試一試，一間以全深圳獨有的四層火鍋出名，另一間則以多種矜貴雲南鮮菇菌食為賣點，兩間都開到凌晨三點，蒲完去食消夜都得！
記者：黃希知
攝影：Manny
舖面雖然是整條街中最深沉的一間，分成兩層面積不算大，但全店均以實木作為主要的裝修元素，就連枱椅到樓梯都選用實木做成，入到去第一個感覺就好似置身於古代客棧中，加埋火鍋的蒸氣，令整間店舖都變得熱騰騰！
四層火鍋分別是最低層涮鍋、第二層燒烤、第三層湯鍋和最頂層的蒸。燒烤多以蝦及羊腿肉作配料，而湯則可以選擇羊胎盤湯或羊鞭湯，蒸除了粉蒸羊肉外，另有南瓜糯米飯、紅薯或枸子田雞以供選擇。無獨有偶，在這裏遇到兩位亞視藝員，我在何柔樹極力推介下試飲了羊胎盤湯，味道不錯，鮮甜不羶，只是羊胎盤的確有點驚嚇。我個人較喜愛涮鍋，湯料鮮甜，再加上涮鍋的配料較為特別，喺香港亦較難吃得到。
熟羊肉?40
平時食開的羊腩總是大大件，今次切成薄片，食落口無濃香的汁水掩蓋，更能食出羊的肉味，老闆黃生說：「香港人好多都怕羶，所以我哋揀選了黑草羊。」他更表示將灼完羊肉的湯用來灼水魚，啖湯就會更加鮮味。
熟羊肚?28
老闆唔講重以為係牛肚，原來羊肚咬落質感真係同牛肚差不多，只係味道比牛肚多了一陣羊味，我覺得最好灼耐少少，一來羊肚愈腍愈好食，而且羊肚滲滿湯會更加好味。
甲魚?40
一向都知深圳多補品，但估唔到連食火鍋都要補，老闆話水魚個名唔多好聽，所以人人都改口叫甲魚，甲魚夠晒滋補，我就最鍾意食個殼，無骨又夠滑，但略嫌甲魚細條咗啲。
亞視藝員羅頌華：熟羊肉入口溶化，粉蒸羊肉麻麻哋！
問羅頌華最鍾意食邊樣時，只見他成個人企晒起身：「最正都係熟羊肉，淥咗好耐都唔會有渣又唔覺羶，入口即溶，但粉蒸羊肉就羶咗啲，我自己就唔係咁接受得到。」
亞視藝員何柔樹：羊胎盤湯無羶味而且好滑！
「我第一次嚟呢度食，個羊胎盤湯最令我感到驚喜，我第一次飲呢啲湯，味道好鮮甜而且無羶味，飲落幾滑。」
店名：原味
電話：(86)82260269
地址：深圳市福田區八卦一路八棟首層6號舖
營業時間：上午10至凌晨3時
交通：可於羅湖商業城乘7號巴士或412、508號中巴於八卦岭下車，由羅湖商業城乘的士約?18。
相比原味，這間菇菌火鍋店裝修略為簡單了點，但勝在舖面頗大，位與位之間都算闊落，我當晚坐了個多小時都不覺得有擠迫感，經理表示逢星期五、六、日都會較多人，八時開始已經要排隊等位，唔想等最好八時前到達。
我今次都係第一次見識這款子母鍋，一望外圍那些紅到深不見底的湯，就知道那是用四川調味料熬製而成的四川辣湯，怕辣的可以選擇叫小辣。而中間的小鍋，則用上十多種不同的菌、雞骨和豬骨，用高壓密封方法隔水燉足數小時的菌湯，叫一鍋已有齊勁辣同清香兩種選擇。
肉芯羊肚菌?88/份
經理說羊肚菌在採集後，都會大量出口到法國，所以每日只限賣一份。隻隻黑黝黝的羊肚菌內釀有碎豬肉和多種野生菌碎，以增強食時的口感，雖然好味，但一碟?88，略嫌昂貴。
紅乳牛肝菌?10/份
紅乳牛肝菌望落同牛肝真係有幾分相似，對我來說賣相的確麻麻，不過咬落口好爽而且滑嘟嘟，口感都幾特別。
毛雪塵小朋友：紅乳牛肝菌最好食！
「我嚟過幾次，我最鍾意食紅乳牛肝菌，咬落又香又滑又脆，所以每次來都會叫嚟食。」
店名：山天111
電話：(86)82434111
地址：深圳市福田區八卦一路八棟首層
營業時間：上午11至凌晨3時