吳君如、曾志偉同佢個仔曾國祥等，前晚喺尖沙嘴為君如男友陳可辛監製嘅新片《金雞》開工。場戲係講述飾演妓女嘅君如去銀行櫃員機提款，遇到持雙程證嚟香港嘅內地人士曾志偉，重俾佢打劫。
君如為咗新戲嘅角色，唔理纖體代言人嘅身份，增肥七磅到一百一十磅，為加強效果，佢重特登墊胸同加個假肚腩。前晚佢着住件小背心就露出咗僭建嘅胸脯同「士啤胎」，認真嚇人，不過君如話拍完呢晚煞科戲，就會即刻減番到一百零三磅。問曾志偉點解唔扮嫖客，佢笑話：「君如咁樣，我啃唔落，其實大家都太熟。」
《金雞》喺聖誕檔期上映，同期新片有劉德華同梁朝偉主演嘅《無間道》、梁朝偉同張曼玉主演嘅《英雄》，但君如冇有怕咁話：「我呢套戲卡士好勁，有曾志偉、梁家輝、胡軍同劉德華四個影帝，重有我呢個影后。另外又有一個表哥張堅庭，一位偶像派，不過佢係邊個要賣個關子。」
蕭正楠同李蘢怡噚日喺屯門一間學校出席港台活動「開心電腦贈學童」，佢哋重同班學生示範裝嵌電腦。李蘢怡話試過用ICQ識朋友，佢話：「我試過識一個男仔，佢send咗段片係佢除緊衫，但我就send咗同學嘅相畀佢。我有同學亦都試過上網識鬼仔。」而讀電腦出身嘅蕭正楠，電腦常識當然豐富，不過聽到記者問佢有冇試過睇鹹網，佢即刻好驚咁話：「吓？冇乜想睇，哈哈！」
劉德華將會喺伊館演出一場「你是我的驕傲」回饋歌迷，華仔最近為演唱會花盡心思，佢構思請三千歌迷同佢同場演出，又想播放佢過去二十年來嘅演唱會精華片段，同歌迷一齊回味，但未知可唔可以實現。重有個難題就係，華仔過去唱過咁多歌，要揀三十首到時唱，真係揀到佢頭都痛，即使叫工作人員各自投票，都係未有最後結果。
劉曉彤噚日為《BuBu子》漫畫影封面，向來男仔頭嘅劉曉彤重自爆曾經俾小朋友認錯係男仔，佢話：「試過有小朋友唔知我係哥哥定姐姐，有時都會認錯我係哥哥，亦都試過有小朋友最後都知我係姐姐，因為佢話我有波波。」
郭富城噚日下午一時多出現赤鱲角機場，問城城出埠去邊度，佢話：「我準備去內地出席一個民族節活動。」唔知城城係咪遲咗到機場，佢好似驚趕唔切上飛機，同記者傾咗兩句就趕住入閘。