日本同香港車壇興起嘅一股小車熱潮，至今仍未有減退迹象，各大車廠所推出嘅新車款，瞬間便會成為車迷嘅追捧對象；而日本鈴木車廠繼廣受歡迎嘅WagonR+、Kei等車款後，較早前又推出全新Lapin同樣備受注目，而香港代理亦決定將之引入。新車不但造型及車廂設備夠吸引外，相宜嘅售價更係賣點之一，睇嚟一場小車市場爭奪戰將會一觸即發。
記者：郭信強
攝影：陳偉強
ImageGirl：Irene
鈴木廠方為迎合時下年輕人喜歡嘅「部屋Feel」，故此特別為Lapin度身訂做咗一個方匣子造型，除咗望落夠晒突出吸引外，全新頭燈及鬼面罩亦見有一份吸引力，就連鬼面罩上嘅鈴木廠徽，亦改換上Lapin嘅專用設計㖭！同時，代理亦為用家提供有多個顏色配搭選擇，以迎合不同車迷嘅口味㗎！
或許因為Lapin以方匣子嘅造型出現，所以車廂空間亦較一般汽車來得實用，除能讓你用盡車上每一吋空間外，車廂多個雜物匣配置，以及能收摺嘅後排椅背，都能夠方便你擺放雜物，又或者增加尾廂容量去擺放大型行李呢！另外，除座椅承托力高，坐得貼服舒適之餘，設備配搭又見齊全，電窗、門邊電摺鏡及原廠冷氣等一應俱全，而一套高級音響更備有MP3播放功能，務求能讓你有至高嘅乘車享受。
雖然新車只以一台658cc直3DOHC引擎作動力核心，但響VVT技術嘅輔助下，不但有充裕動力輸出，而且重有低耗油量（19.0km/L）及低廢氣排放嘅表現㖭！而由前輪透氣碟及後輪鼓式所組成嘅制動系統，加上ABS裝置，除咗可以畀到你有收放自如嘅體驗外，雙安全氣袋及堅固車架結構，亦能為你帶來充份嘅保護呢！
未試車前覺得部車無Turbo，性能表現理應唔會好突出；但親身試車後就覺得佢予人有動力充沛嘅感覺，就算坐滿四名成人都不成問題，而且獨特嘅造型及車身色調配襯，定能吸引到一班年輕車迷呢！
「當我第一眼見到部車嗰陣，就覺得佢嗰個方匣子造型好Cute又過癮，就連車身顏色我都好鍾意；車廂又闊落，最緊要係座椅用料好之餘，坐得又舒服呢！」
Chabo：「我對Lapin可算係一見鍾情，新車推出三日之後我就到陳列室訂車，唔夠一個月就已經有新車揸；而我最鍾意就係佢外形同車廂陳設都予人有不錯嘅觀感，而且又見好力同慳油㖭！」
（摘自：
Puiani：「部車嘅造型夠吸引突出之餘，乘坐舒適度又高，而且引擎輸出重一啲都唔差；但可惜車廂雜物箱嘅容積較小，略嫌載物量較低。」
（摘自：
引擎：658cc直3DOHCVVT
馬力：54ps/6500rpm
扭力：6.4kgm/3500rpm
傳動：4前速自動波
懸掛：（前）麥花臣支柱（後）拖曳臂
制動：（前）透氣碟（後）鼓式（ABS）
輪胎：155/65R13
尺碼：3395×1475×1505mm
軸距：2360mm；車重：780kg
平均耗油：19.0km/L
新車售價：約港幣9萬
查詢：香島汽車（23320091）