Katherina家住半山，平日通常到中環嘉咸街及結志街一帶的街市攤檔，或西環第三街街市買餸，她說第三街街市的選擇比較多，價錢較便宜，不過由於自己的服裝店就在蘇豪區，故很多時都貪方便走到嘉咸街的攤檔。
由於以$30為限，Katherina用每一蚊都要計過度過，最後決定平平哋買5蚊豬肉，可能見到靚女買，肉檔老闆都無「詐型」，重話切多啲畀佢！她還說自己完全認得掛在肉檔上每個豬的部份，一邊指着一邊說：「嗱！呢啲脢頭就係用嚟整叉燒嘅，呢啲豬𦟌，重有西施骨，就用嚟煲湯嘅，嗰啲五花腩，燜完連皮食好爽㗎！」專業的Katherina果然並非浪得虛名！
行到菜檔，買埋西芹同節瓜，只見Katherina左揀右揀，最終都買到心水靚貨，她說揀節瓜最緊要外形夠肥肥矮矮同多毛，最難得菜檔老闆任揀唔嬲，重搭多條葱給她，又再一次證明靚女買嘢有着數！
Katherina對揀蛋亦有心得：「我最鍾意食黃黃哋色嗰啲大陸農場雞蛋，嗰啲蛋係好天然，外國有啲農場會特別催谷一班專生蛋的雞，會打針令佢哋生多啲雞蛋，所以有時打蛋會有兩三隻黃，我就唔係幾鍾意食嘞！」