環球動力（231）停牌好幾日，除咗確認珠海格力集團揸住兩成股份外，重堅稱控制權不變。隻股噚日復牌，一度跌至最低6.9仙，雖然頂番上7.3仙收市，仍大跌11%。
經紀陳話，隻股唔會咁快玩完。環球動力一條氣由3仙炒到上8仙樓上，點會冇炒家跟風，而且好多炒家重係篤手指玩即日鮮，停咁耐牌，復牌之後自然有沽壓，難免有人被斬倉，令股價急跌。不過，新主要股東來頭確係唔細，兼且入局不久，乜都未搞過，又點會咁快玩完？
不過，小初就有啲擔心，唔知四奶揸住嗰手貨點收科？經紀陳則叫小初淡定，但唔肯講原因，唔知佢葫蘆裏賣乜嘢藥。
另外，信德（242）上次供股，小初有份參與並一直揸到𠵱家，其間曾經有小小波動，但估唔到真係可以守得雲開見月明。信德間接增持澳門賭業，股價因而急升22%，收1.61元。睇嚟隻股未升完，小初重可以賺多些少先走。
慕容小初