美股周三晚回升，杜指上升148點，收8623，納指更大升3.3%，收1419。杜指及納指雖仍未出現突破性走勢，但及時大幅回升，扭轉近日腳軟軟想跌的趨勢，好友可以暫舒一口氣，並寄望美股升勢持續，助港股上試10400。
港股昨日走勢和周一近似，都是先高後低。恒指借助外圍升勢，高開110點，見全日高位10081後急速回吐，之後在10000附近窄幅上落，最後收10003，升32點。
恒指本周一直守在小雙底頸線9880之上緩步前進，向好方面諗，主要是美股周初亦出現整固，大戶等待確認美股去向後方動手，此外亦配合期指結算時間，若過早抽高恒指，會惹來獲利盤沽壓。
趙飛雲以往炒輪未試過咁長情，第1注買入的恒指Call輪9552已持有達兩個星期，昨日早市9552高見0.37元水平時曾有點心動，但唔想錯失今次轉角市升勢，繼續持有，希望賺取更大回報。睇形勢，好友最快今日或最遲下周初，將展開大攻勢。
偉易達（303）昨日以大陽燭勁升，趙飛雲今次瞓晏咗冇上車，但周二已提醒讀者偉易達轉強可短炒，希望有讀者把握機會贏錢。
另一隻早前玩過的品質國際（243）亦進入關鍵時刻，隨時出現突破性走勢，如果冇乜隱藏嘅利淡因素，向上突破機會應較大，不妨留意走勢。
趙飛雲