分析師Eric認為銀行唔放寬樓按七成限額，孫九招救市未夠十全十美，但任志剛立場企硬，孫公明揚都冇佢符，而且劉金寶、柯清輝表態支持七成按揭，政府唔會再push咯，Eric對此忿忿不平，賓架W於是教訓佢：「喂，Eric仔，好多事唔係根據數據推理辦事嘅，𠵱家你都可以借九成㗎，不過額外兩成係要買『按揭公司』保險之嘛。如果金管局放寬上限，你唔使買保險就借九成，『按揭公司』重有乜生意好做，不可不知，按揭公司係任總催生，係佢嘅baby噃！」
Eric仔話：「我都知，不過你話港人利益大還是按揭公司利益大吖？」多拗無謂，事實便是如此。食完飯返到公司，見到一位讀者Paul嘅電郵都係講呢樣嘢。阿Paul好心水清，記得《壹週刊》楊社長寫過文章反對設立按揭證券公司，當時任總話如果冇一間咁嘅機構，香港銀行體系會欠一千億元資金嚟做按揭。結果呢？𠵱家銀行水浸，想多做啲按揭都唔得。唉，世界就係咁嘅啦，阿Paul，你就算叫楊社長寫多幾篇大塊文章，都唔會改變情況。
讀者Windy來電郵講馬主協會晚宴嘅主唱歌星LiLaiHa，Windy話：「你哋居然唔知佢係邊個？李麗霞人稱黑妹，早十幾年前紅遍油尖旺夜店，唱功拍得住大歌星，更於紅館開過演唱會。睇怕你哋啲商界巨子達官貴人都係少出嚟蒲，清純如蒸餾水！」講真，Windy，商界人物好少去油尖旺夜店，唔識LiLaiHa（李麗霞）一啲都唔奇，我哋有時確係好純㗎。