之前搞作多多嘅港版XBOX，到今日終於正式推出市面，機價、配件及七款同日發售行貨Game亦塵埃落定。代理為增聲勢，重搞咗好多宣傳攻勢同買機套裝優惠，勢要力搶聖誕黃金檔期，代理更送出五部XBOX同二百條靚靚頸繩畀《打機樂園》嘅讀者㖭。
記者、攝影：徐影龍 ImageGirl：王穎
逢星期一至六刊出
今次代理嘅洲立互動媒體為力谷XBOX在港聲勢，不單在玩具反斗城、百視達等多個地方設立售賣點，而且重會擺放XBOX機座，設有LCD屏幕同雙打手掣，供玩家免費試玩新Game。今日係正式推出行貨嘅大日子，重安排咗20架貼滿XBOX圖案嘅MiniCooper，由Microsoft總部數碼港出發，巡遊全港九新界作宣傳活動，車上更有靚靚Pomoter周街派傳單㖭。
講番行版XBOX，眾所周知主機連一個手掣賣$1,599，不過代理新加一個$1,920套餐價惠，除XBOX外重包一隻《BLINX》、一套行貨DVDKit及XBOX背囊，原價差不多要$2,300，有心將XBOX當埋DVD機嘅玩家值得考慮。遊戲價錢方面，由XBOXGameStudio開發嘅Game賣價一般為$299，第三廠商賣價上落不大，約$280至$320。
值得一提係行貨XBOX有一年保養期，若遇着部機有咩唔妥，拎返代理維修後會有專人上門還番部機畀你，若屬較嚴重者，代理則承諾48小時內換另一部XBOX畀你，咁嘅售後服務的確夠細心。
XBOX另一賣點，就係具有5.1音效輸出，配合專用嘅DVDKit，搖身一變成為一部DVD機，不過由於法例所限，行貨DVDKit必需鎖定為第三區碼，當第一次插入DVDKit後會完成XBOX區碼設定，之後冇辦法更改，即係唔可以貪得意插入其他區碼嘅DVDKit，就算HardReset都冇用，必須攞返去代理度改，不過今次唔會承諾免費更改同48小時內換機畀你，機迷買DVDKit時要小心喇。
記憶卡 $209
S-Video線 $149
色差線 $149
網絡線 $119
同日跟隨行貨XBOX登場嘅Game，一共有七款咁多，不過好奇怪名單內並無招牌作《Halo》，可能等完成中文化後先再谷都未定。雖然呢七隻行貨Game重未中文化，不過亦並非單單加入一頁中英文說明書咁簡單，而係由封面到說明書都採用中、英語言，詳細講解遊戲玩法，香港玩家易明得多。
XBOXGameStudio重頭大作，以時間玩法包裝嘅動作Game，主角外形古怪，布景及敵人都有一股魔幻味道，要順利過關必須把握各式時間道具。
美版已推出一段時間，不過仍屬高質素賽車Game。遊戲內超過200條賽道及25款靚車，包括法拉利F50、保時捷BoxsterS等。值得一提係2003年推出嘅續篇，會加入以會展為主嘅香港賽道。
除《WinningEleven》外，《FIFA足球》喺PC界亦甚為出名，新一集以2003為名，主要係加入及更新更多球員資料，遊戲解像度及畫質亦因XBOX機能而有所提升。
美版剛新鮮熱辣推出，XBOX都算極速引入行貨。遊戲以MetalGear2為藍圖，加入各種新玩法，包括Mission同SnakeTale新模式，對白及介面則改為全英文。
名作系列嘅續篇，玩家揸住林寶堅尼、法拉利等世界名車，發力練贏對手之餘，重要不時擺脫警車嘅追捕，過程相當刺激過癮。
故事以第二集為主，講述主角重返魔法學院展開第二學期生涯，以尋找史萊哲林傳人真正身份為主，遊戲內設有多款迷你Game。暫時只得英文版，中文化介面及內容則在11月29日推出。
充滿美國風格嘅動作遊戲，性感女主角周圍打低殭屍敵人，動作尚算多姿多采。
之前提及嘅XBOXDVD套餐已經夠抵玩，若果你打算今日買機，就要拿拿臨拎埋今日呢版《打機樂園》，1:00pm至2:00pm到銅鑼灣皇室堡玩具反斗城出機，因為會額外送多一盞型到爆嘅Disco靜電燈畀你，呢盞燈不但屬非賣品，而且成本價差不多要成二百蚊，名額限頭一百名出機玩家咋，有買趁手。
讀者同樣只要拎住今日呢版《打機樂園》，到皇室堡玩具反斗城，就可免費獲得一條XBOX型仔頸繩。呢條頸繩設計夠型之外，重設有伸縮彈性設計，最啱放入工作證同八達通。名額得二百個，先到先得，手快有手慢冇㗎喇。