美股大升，好友以為今回冇死，恒指最高升過110點，埋單只係有進帳32點，但總算企響1萬點樓上，期指高水19點。
藍籌股表現好參差，滙豐（005）卒之收90元以上，收90.25元，係8月23日以來首次。倫敦同紐約滙豐，做價例牌高過港股，收購HouseholdInternational個deal，已「確認」係好嘢。
滙豐硬淨，大隻銀行股都會受到帶動，恒生（011）最高87元，收86.25元，冇升跌。除咗有望滙豐帶動之外，恒生係最高息嘅銀行股，股息率5.7厘，銀行存款實際冇息，啲錢會有部份流入高息銀行股，恒生係最佳對象。恒生Call輪9402收35仙，喺正股冇跌之下自己回落5.4%，啱晒趁低買入。隻輪勁爆炸，明年1月到期，溢價2.9%，槓桿率去到24.6倍。正股上番5月93.50元個位，隻輪平水計值82仙，有134%回報。正股上到90元，隻輪都值48仙，回報都有37%。
新地（016）跌1格，新地Call輪9525回落6.2%。新地下禮拜二除息1.60元，新地Call輪暫時要避開吓。長實（001）跑贏晒其他大隻地產股，收56.25元，升50仙，長實Call輪9517收52仙，只升得1仙，值得短炒。隻輪明年2月夠鐘，溢價5.2%，槓桿率10.8%，數據靚。
章盛