二人組合Shine早前透露已還清欠經理人的五十多萬元墊支費，二人無債一身輕，日前他們便往尖沙嘴通利琴行睇樂器，即場彈結他和打鼓，雖然搞足半個鐘冇幫襯，但二人揚言會努力賺錢添置樂器。
二人男子組合Shine出道未夠一年，唱片銷量理想，又頻拍電影，所以他們早前已將欠經理人的五十多萬元墊支費還清。由於Shine未來會有真銀落袋，難怪他們心癢癢，有意添置樂器，全力搞好音樂。
Shine日前往尖沙嘴通利琴行，他們甫入店內，便走到結他架前左睇右睇，然後就各自取下幾支結他試音，徐天佑試音時相當肉緊，細心聆聽音質，而黃又南更索性蹲在地上彈結他。
接着他們又去睇鼓，天佑一手就攞起鼓棍打鼓，旁邊的又南就戴上耳筒。二人不時停下來談話，雖然時有途人對他們投以注目禮，但Shine卻未有理會，全情陶醉在自己的音樂世界中。
Shine在琴行內逗留了約半小時才離去，不過未有幫襯。
天佑日前在電話中說：「我成日都去琴行㗎，去嗰度彈鋼琴囉。店員唔會話我冇幫襯㗎，我有買琴書，之前重買咗兩支結他，都成四萬幾蚊。我好鍾意音樂，我聽唱片公司講，我哋嘅新碟銷量達金唱片，所以我哋要畀心機再搞好啲。我𠵱家最想買鋼琴，但屋企冇位擺，所以我要先買層樓，至可以買琴。供樓都得嘅，我希望明年達成願望啦。」
採訪：朱芷瑩
攝影：甄朝健