嚟番呢個禮拜歐洲幾個聯賽都有大戰，包括意甲聯嘅米蘭打吡，以及西甲聯嘅巴塞對皇馬宿命大戰。有幾支國家隊嘅統帥可能唔想得罪各大球會，免日後唔放人，所以響周中幾場國際賽，部份球星都只係落場輕抒腳頭，或者踢半場就算。
好似意大利對土耳其，韋利、恩沙基、迪比亞治奧等都只係踢半場就換出；葡萄牙對蘇格蘭，雷哥斯達及費高亦踢唔足全場；西班牙對保加利亞就更加唔使講，文迪達及希古拉等亦只係做咗半場英雄。
𠵱家國際足協有例，規定國家隊一年內最多只可強制性從球會徵召球員歸隊，換句話講只要球會放人次數達標就有權唔放人，所以亦難怪查柏東尼、沙斯呢啲國家隊教練，都要錫住班大球會嘅國腳。
喺前日德國對荷蘭嘅友賽，德國要靠成四年冇代表國家嘅波碧入波，咪話唔心噏，不過波碧肯以後補身份入國家隊，把握上陣機會呢種精神就認真抵讚，唔通好似法國嘅安歷卡咁玩有性格，唔肯以後備身份入隊好咩？其實機會係自己爭取返嚟，話唔定天份高嘅安歷卡如果肯代表法國嘅話，喺前日有出色表現，從此奠定國家隊席位呢，真可惜！
歐洲足球先生候選名單一出，各界都開始對結果作出預測，好似噚日提過，亨利唔希望朗拿度呢類唔算成年有好表現嘅球員得獎，亦有人話「羅馬王子」托迪好應該封王，不過講嗰個就係球圈出名嘅「明燈」球王比利！照咁睇，托迪咁樣俾比利哥金口一點，叠埋心水等出年都得囉！
啱啱響作客南韓嘅友賽射入兩球、協助巴西贏波嘅「哨牙仔」朗拿度，對於自己嘅表現就非常滿意，重話呢兩個入波可以畀到佢響周末巴塞隆拿對皇馬大戰嘅比賽信心，一定掂咁話喎！哨牙哥，呢場你嘅對手只係南韓咋，入兩球有乜咁出奇？重要飛到去亞洲咁遠，一來一回又唔見咁啲體力，唔好開心得咁早喎！
巴克利今日將會喺自己個節目「ListenUp！」上當眾錫男人屁股！不過唔係錫姚明嗰屁股，而係錫另一個講波佬史密夫嘅屁股。原來巴克利喺上個禮拜同史密夫打賭，睇死姚明今季一定一場賽事攞唔到十九分，結果𠵱家自食其果。其實成件錫屁股風波根本就係博宣傳，志在吸引傳媒同球迷嘅注意，𠵱家個個都知道巴克利要當眾表演錫屁股，佢個節目嘅收視肯定勁升啦！
逢周一至周五見報