雖說通縮持續，零售業市道疲弱，不過百貨公司舉行大減價，對消費者來講仍然有強勁的叫座力，就好似每年均會舉行減價購物日的西田百貨，上季購物日便締造了頭一個鐘人流八千，全日人數高達十二萬人次的驚人紀錄。今季西田已鐵定於明、後兩日再接再厲進行減價清貨，部份產品更會低至三折發售，相信萬人空巷的情景將會再次重現，一心掃平貨的精明消費者，謹記留意下列掃貨貼士，咁就唔怕執輸啦！
記者：尹珊珊
攝影：陳穎
ImageGirl：Irene
西田百貨每年都會舉行兩次減價購物日，大部份正價貨品減至半價，個別筍貨更會低至三折發售，根據上季紀錄，朝早六點幾已有第一個顧客排隊，九點未夠門口的人龍經已打晒蛇餅，聚集咗千幾個準備入場掃貨的顧客，經統計後頭一個鐘人流高達八千人，全日人數大約有十二萬人次，熱賣貨品如旅行篋、床上用品、煮食用具等等，唔使兩日已被人掃清光，至於這次冬季購物日則以羽絨褸、羽絨被、羊毛內衣等防寒衣物選擇最多最齊，家庭用品、家具、兒童玩具等亦會以特價發售。
原價：$890
特賣價：$299
CBSports是西田獨家引入的滑雪用品牌子，尤以羽絨外套最受用家歡迎，就像這件女裝短身羽絨褸，質料含80%羽絨，摸上身軟滑柔順，着上身又夠貼身，另有多種顏色及大中小尺碼可供選擇，平日做減價最低不過是8折，但在減價日兩天將會破天荒減至3折發售，預計成為女裝部熱賣貨品之一。
原價：$1,590
特賣價：$399
大大件的羽絨中褸雖然具保暖作用，但着上身卻似足機械人咁，不過呢件間棉款的林寶堅尼羽絨外套，設計卻非常修身纖巧，再配合可隨意拆出的毛毛領作點綴，予人女性化的感覺，顏色亦以米、杏、黃、粉紫等粉色為主，打破一般羽絨褸的悶局。
原價：$1,680
特賣價：$399
同樣由西田獨家發售的GuardianDeity雙面羽絨，面層為尼龍風褸，底層則為絲絨外套，具防風、防水及保暖作用，可分拆或組合穿着，就算到外地滑雪都可以抵禦寒風。
原價：$199-$460
特賣價：全線七折
有二百多年歷史的英國Morley羊毛內衣，有齊女裝、男裝及童裝，質料以100%純羊毛製造，既柔軟又薄身，款式雖然比較老氣，但一直有其捧場客，𠵱家趁七折買定，等入冬時便可以穿着。
原價：$1,930
特賣價：$599
貨量：限售100套
臨近聖誕節這旅遊旺季，係時候買定個實用的旅行篋，全力推介這套Elle一套五件的旅行套裝，有齊29吋拉桿篋、20吋手提篋、背囊、腰包及側孭袋各一，共有灰、黑兩色，計起來平均每個不過是百多元，自己用唔晒重可以同朋友夾份買。
原價：$899-$999
特賣價：$399
專為嬰兒設計的羽絨被，內有70%純羽絨，質地非常輕身柔軟，蓋在BB身上唔覺重，共有35"×50"及46"×60"兩種尺寸，減價日以均一價$399發售。
原價：$4,380
特賣價：$999
貨量：限售50張
成年人一日平均有成8個鐘頭睡覺時間，揀床褥自然不能掉以輕心，呢張金美夢單人彈簧床褥（尺寸：4"×6"）彈性適中，能令睡眠時可以得到最舒適的環境，同時本身有一定的名牌效應，𠵱家售價減到一千有找，故不難成為熱賣貨品之一，但留意產量只限50張，有心人記住第一時間入貨。
原價：$937
特賣價：$299
貨量：限售100套
生鬼搞笑的胡迪同巴斯光年，一直深受大小朋友喜愛，呢套最新推出的ToyStory單人全棉床上用品套裝，有齊床笠、枕袋、多用被袋連被芯，實用之餘又可同時滿足到Fans的要求。
原價：$269
特賣價：$199
香港地寸金尺土，買架單車返屋企確係幾阻地方，呢部可以摺叠起來的兒童三輪車，摺合後體積縮細，可以幫你慳番唔少位，同時重有得揀米奇、斑點狗、維尼熊、翠兒等唔同的卡通人物，就算屋企細細，都可以買番部畀小朋友玩。
綜合過往經驗，要第一時間掃到心水筍貨，事先最好要做定功課，𠵱家就醒你下列掃貨貼士：
1﹒曾經有醒目的顧客第一時間入內搶旅行篋，跟住再將其後揀到的貨品塞入篋內，到畀錢時先取出付款，咁就唔使攞到一抽二拎咁麻煩啦！
2﹒有心買羽絨褸的朋友，不妨今日就預先去服裝部揀定款及試埋size，試衫時間都慳埋。
3﹒西田百貨預早印定一份購物優惠日的傳單，列齊今次減價日最筍的推介貨品，入場後記住攞番張。
4﹒呢張傳單同時會預先寄畀VIP客，以及抽樣寄畀沙田區居民，有幸收到呢張傳單的朋友，可以預早喺今日揀定有咩心水貨，有時間就最好去埋現場視察吓。
5﹒西田會聯同恒生信用卡或聯營卡推出優惠，凡於購物日當天以上述信用卡簽帳滿$1,500，即可換取$50禮券一張，每日只限500張，此外，部份特價貨品更額外獲得95折優惠，記住叫埋有上述信用卡的朋友一齊掃貨。
西田購物日
地址：沙田新城市廣場第三期（入口設於3樓美食廣場）
電話：26941111
日期：11月22日至23日
時間：星期五上午9時至晚上10時半；星期六上午11時至晚上10時半。
備註：在購物日舉行期間，設有免費穿梭巴士來往西田至大圍、沙田及馬鞍山，詳情可參閱店內告示。