呢輪喺水着界出身而成功發圍嘅日本女星突然多咗，小池榮子擔正做舞台劇，乙葉上NHK電視節目自彈自唱榮升純情歌手，釋由美子拍哥斯拉電影拍到喺張海報度大過哥斯拉幾倍，但硬係唔見佢哋嘅好姊妹佐藤江梨子有份！
其實我大口羅拉睇人嘅眼光一向唔差，講拍水着夠搏命多造型嘅，一定首推佐藤妹。聽講佢好有運動天份，韻律操、踩單車同打保齡樣樣精，所以佢影相嘅時候，都有意無意露兩手，色相活力都唔差。
點解好多遲過佢入行嘅女星都上晒岸，重未有佐藤妹份嘅呢？我最近八到原來啲監製同導演都好唔鍾意佐藤妹把街市賣菜聲，話沙到鵝公喉咁喎！例如佢演出深夜電視節目《PRIDE王》，叉起條腰同其他女星鬥煮嘢食，啲男評判餸菜未入口，個心都揀定隔籬枱清純玉女煮嘅嘢贏啦！即係話到尾，佐藤太粗魯冇儀態，嚇走晒啲上位機會囉！