九肚山呢個月頭二十日已經成咗六間屋，包括兩間松柏花園同四間皓朗山莊，總值八千幾萬元，氣氛比上個月旺得多。其中啱啱易手嘅皓朗十八號屋，原本喺8月連同隔籬十九號屋，以孖屋形式賣咗畀新加坡籍兄妹，作價3100萬。
佢哋近排又睇中發展商重新搭建為示範單位嘅十號屋，於是同發展商傾掂數，放棄十八號屋，轉買十號屋。間十八號話都冇咁快就有買家認頭，以1360萬成交。睇怕佢哋都要快啲扑槌決定嘞，唔係間十號屋好快又冇埋。
個市咁旺，有時想買心頭好，秘訣唔單止要夠快，重要畀多啲錢再多啲誠意先得，大埔滌濤山一至二十三號董事屋，發展商嘉里惜售淨放租，偏偏有買家寧願畀多百幾萬都要買，發展商終破例賣畀佢，造價1350萬元。
美聯上環帝后華庭分行噚日開幕，兩間發展商長實同新世界，都派要員出席。新世界高級經理何伍燕榆（圖二），一身名牌，成為全場焦點。搞到長實執行董事趙國雄自愧不如，吟咗毛主席一首詩：「中華兒女多奇志，不愛紅妝愛武裝!」又改為：「中華兒女多奇志，既愛紅妝又武裝!」。
帝后華庭呢排曝光率甚高，早兩日係由代理搞記招，今日就輪到發展商自己搞。
另外，新地嘅西半山寶珊道1號「寶珊庭園敘」，原來係今日舉行至真，聽講請咗本港唯一嘅室樂團，演奏古典名曲，重有法國南部甜品招待。
蘭西聽市場人士透露，華潤超市啱啱落實租用北角英皇道八十九號地下一至二號舖，面積2640呎，月租八萬蚊，呎租三十個三。
市場人士重講，華潤超市由8月到𠵱家，先後租咗五個舖位，合共萬四呎，月租42.8萬。可能有見百佳同惠康開嘅舖都係以大面積為主，所以華潤走另類路線，以免同兩大集團正面競爭。
華潤喺增加分行之餘，重會將超市大變身，內部裝修、燈光同貨架設計等都同以往唔同，令顧客耳目一新。當然唔少得嘅係畀多啲優惠買家啦！市場多啲競爭，得益嘅係消費者。
雖說市道轉好，但地產代理嘅拼搏精神未見轉弱。新地為獎勵吓代理努力促銷愛琴海岸嘅成績，噚日聯同其他合作夥伴，喺個盤嘅會所泳池邊舉行頒獎禮。奪得全場總冠軍嘅係美聯，聽營業董事布少講，佢哋共促成379宗，獲150萬元獎金。
乙組冠軍係鴻運，據知做咗七十幾八十宗，有五十萬元獎金。兩間行嘅高層，喺現場分享得獎感受，總結係，做地產代理，無論好市定淡市，少啲拼勁都好難生存。
蘭西
電郵地址：