恒指收9971，期指收9981，高水10點。大市冇乜氣氛，朱總為本港打打氣，股市唔多領情，皆因大家都喺度觀望，包括睇吓美股點發展。美股如果冇乜壞嘅變化，恒指升破1萬大關，照計唔係太難。
稍為靚少少嘅大藍籌，有太古A（019）同中移動（941）等。太A收32.70元，升30仙。太ACall輪9475收28.5仙，升得0.5仙，冇乜點跟到正股，值得兜番啲。太A上月杪34.40元，𠵱家恒指高過當時200點，太A則仍低1.70元，有炒落後可能。9475由當時43.50仙跌到𠵱家，調整咗3成半，跟正股上番去機會大過下跌機會。隻輪明年5月到期，溢價9.3%，槓桿率11.5倍，數據唔錯。
中移動宣布10月底用戶人數，市場反應良好，下晝一度搶上20.65元，最後收20.40元，仍有20仙進帳。上禮拜19元見底後，重建上升軌，反覆向上推進，兩隻熱門Call輪9526同9532未升夠，繼續係搵米對象。
聯通（762）亦宣布10月份經營數據，其實唔錯，奈何近期累積升幅過大，數據入市後反而有回吐，收5.75元，跌15仙，但隻熱門Call輪9383收8.7仙，幾乎冇跌到。明年9月至到期，溢價過高，冇跟正股跌，買唔過，想買電訊股Call輪，暫時以中移動Call輪比較適合。
章盛