中國電訊提高接入費單嘢，朱總嚟到香港都要重提，信息部同中國電信被佢當眾落面，當然冇癮，但反應神速即時致函朱總告御狀嘅朱幼麟，就非常風騷，為自己參選人大拉起票都零舍投入。又好難怪，今次連朱總收到佢封信，都以為佢係港區人大。
噚日班記者笑飛天朱，人大都未開波，朱總已經「欽點」咗佢做人大，重唔贏硬？飛天朱反而好實際，話今個星期選民嘅意見先最重要，其他人包括朱總嘅說話都係次要。嘩，咁沙膽睇小朱總？大家又研究到，原來領導人真係會睇寄畀佢嘅信，咁以後雞毛蒜皮嘅事，香港人都寄封信，國家領導人咪好唔得閒？飛天朱陰陰嘴笑，話要有技巧，意見先可以直達天聽。原來秘訣就係署名簽上「飛天朱」，朱總嘅秘書唔知乜頭乜路，肯定唔敢掉咗封信。
傳真︰2623-9278
電郵︰