十一月好日子多，八方前晚參加完梁天偉女兒婚宴，又得高人報訊，話今個月尾會有一個超級婚禮，涉及東亞銀行李氏家族、廖創興銀行廖氏家族、同愈嚟愈吃得開嘅永泰鄭氏家族。
婚禮定於下周六舉行，會喺香港搞個Party。新娘子叫周瑋瑩，英文名Jacqueline，父親係名醫周國治，母親李志珊；三十年前周李聯婚，轟動一時。
李志珊父親係李福權，伯父係李福和，叔叔係李福逑，阿爺就係東亞銀行創辦人李子方。李家呢一脈現時最出名應該係李國能，即係新娘堂舅父；至於李國寶、李國章同李志喜，則屬李冠春一支，疏少少。
新郎廖坤城Christopher，係廖創興銀行創辦人廖寶珊個孫，父親係廖烈忠醫生，母親Connie鄭係永泰鄭家千金，兄弟有鄭維志及鄭維健。
八方噚日打電話恭喜新郎哥，喺的近律師樓做律師嘅Chris，笑得好開心，猛講多謝，佢話未婚妻最近辭咗花旗銀行份工，專心籌備婚禮。佢話婚後想太太唞番陣，可以去進修，總之一切由Jacqueline決定。呢對璧人皆出自名門，由細識到大，不過只係拍咗拖三年。總之李家外孫女出閣，廖家娶媳婦，呢個Party一定好熱鬧。相信寶哥哥同廖碧欣到時都會喺Party。
傳真︰2623-9278
電郵︰