人氣女子組合Cookies喺本月底推出嘅寫真集叫《DeliciousCookies》，呢本寫真嘅製作費超過六位數字，而且大玩制服誘惑，佢哋除咗會扮護士、拳師、車房仔、單車手同賽車手，重會着芭蕾舞衣、泳衣同背心短裙，以八款唔同造型示人。據知寫真集訂價一百元，目前定單已經有成萬本。
由於有九位成員，加上Kary同Gloria要返學，Theresa之前又曾入醫院，所以影相嘅檔期都幾難就，而Theresa一出院就即刻開工，雖然大病初愈，但佢影相時笑容燦爛，好專業。
有指Cookies抄襲Twins唱歌拍戲同出寫真集，隊長Stephy解釋話：「我哋出道冇耐，都係唱歌拍戲㗎啦，公司安排乜咪做乜，原本都想去東南亞影相，但大家時間難就，希望下次去第二度。」
林嘉欣喺金馬獎攞完「最佳女配角」同「最佳新演員」獎之後，去咗韓國釜山國際電影節，佢今次係代表《男人四十》呢部戲嘅。噚日嘉欣返香港，不過佢出現機場時，咁啱撞正國務院總理朱鎔基離港，搞到機場保安好嚴密，部份電梯又封埋，嘉欣初時都唔知乜事，後尾先知係中央領導人要走。
鍾鎮濤同女友范姜喺台灣接受《小燕有約》訪問，主持人張小燕問阿B有冇打算娶范姜，阿B話有咁嘅打算，但係范姜冇話要嫁畀自己，重話等自己經濟環境好啲，就會畀范姜過好啲嘅日子。阿B呢一番肺腑之言，聽到范姜面都紅晒。
新力唱片歌手周永恆（Roy）同阿叔周啟生好似因為錢銀瓜葛，搞到要報警求助。同阿Roy同公司嘅盧巧音，噚日喺蘭桂坊一個記招上，就為周永恆講好話：「我以家姐嘅本能維護阿Roy，佢得十八歲，冇能力應付，佢今日同我通電話，話就係因為唔知點解決先至報警求助。」
金城武噚日喺台北，為三菱汽車宣傳。喺記招上，司儀陶晶瑩問金城武工作、愛情同房車，邊樣最重要，佢諗都冇諗就話：「家庭最重要。」但如果女朋友發脾氣刮花佢架車，金城武就話會先睇吓女朋友為乜嘢嬲，先決定飛唔飛女友喎！