中國領導人經常都話會全力支持香港，不過朱總言論具體到要動用中央2600億美元財政儲備來支持香港，就真係令阿虎感動，但噚日港股只是微升6點來回應朱總的誠意，實在唔畀面。
不過話時話，香港經濟轉差與資金直接流入中國大陸不無關係。另外，基本法又定明公務員待遇不可低於回歸前水平，令阿松難以大幅削減公務員薪酬來控制財赤，呢方面中國亦應該負上一定責任，大力支持香港渡過困境是理所當然。
現時港府打算以穩定樓市來挽救財赤，但推出9招後新盤銷情仍是一般，呢次真係要拜託朱總同一眾中資老細幫手。舉例說，買入6萬個單位，假設每單位200萬元，全部都只係1200億元，只不過佔中國外滙儲備6%，中國應付有餘。屆時若港人對樓市回復信心，樓價急升，到時重可以令中央外滙儲備暴增。
城市電訊（1137）全年純利升近70%，賺9113萬元，但竟然未如市場預期會派息，令市場大失所望，股份一度被拋售跌，勁跌8.5%，低見1.50元，最後收1.54元，跌6%。ｉ師傅氣沖沖對阿虎話，就算城電唔派息，都好應該派紅股或認股證，當係安慰獎，家陣乜都冇，點叫人跟佢炒。股東表示不滿，主席王維基即刻話考慮下年派中期息，希望留住捧場客。不過，到時派唔派息，重要睇吓城電能否控制明年資本開支，至於派息承諾，大家都係聽住先啦。
佑威（627）近日成交急增，但股價停滯不前。黑客提醒阿虎要小心，此股近日成交相當大，前一兩日重有成3至4千萬元，但股價一直維持在0.41元水平，好似有人想谷大成交，吸引散戶追炒，各位追貨要小心。
阿虎