早排炒西氣東輸，唔少燃氣股都借勢勁炒一番。中國燃氣（384）在年中燃氣股熱潮時，亦曾經受惠，股價由0.40元炒上1.30元樓上。不過，隻股當時每日成交，最多都係１千萬元左右。
中國燃氣噚日公布投資河南燃氣單deal，股價只不過係微升2.9%，收1.06元，成交金額只得135萬元咁大把，而且買賣盤都係熟口熟面嘅炒家。燃氣生意現時予人開到荼䕷之感，自然唔再咁Sell得。
經紀陳話，佢亦有同感，而且今次單deal嘅搞手，舊陣時係幾威，家陣在證券界仍然大把朋友，但畢竟略為過氣，比較起現時嘅狼胎新秀同埋急進嘅大陸炒家，似乎差咗好多。
講起新秀，由股壇女新秀主理的永成化工（850），仍然維持日日大成交，股價重愈抽愈高，但久唔久就出現一些非自動對盤。經紀陳話，似係炒家趁高批貨迹象，各位跟炒唔緊要，但開始要小心。
慕容小初