深圳7-11騎呢精品特別多

深圳嘅街頭其實同香港無乜分別，都係隨街都搵到間7-11，不過深圳嘅7-11同香港比就特別多騎呢嘢賣，就好似近住八卦一路嘅7-11，算係較大嘅一間，入面所賣嘅嘢都好齊全，除咗日常用品、魚蛋等關東煮外，重有玩具同精品賣㖭，點騎呢法？不妨帶大家睇睇。
記者：歐嘉荃
攝影：Manny

騎呢一：香草維他奶
售價：?2.7
維他奶口味多就係人都知，原味、麥精、朱古力、椰子味已經見慣不怪，喺深圳居然重有香草味維他奶。香草即係呍呢拿，我第一眼見到就覺得好得意，飲落好似呍呢拿雪糕再加豆奶咁，感覺幾得意，不過我就覺得原味最好飲。

騎呢二：數碼暴龍機
售價：?60
喺香港要買數碼暴龍機，當然要去玩具舖，喺深圳，7-11竟然都有數碼暴龍機賣，好似呢部數碼暴龍機，盒內附送一張暴龍卡，再加埋似「他媽哥池」嘅玩法，真係幾過癮，不過賣成?60，好似貴咗啲喎！