大市無甚睇頭，恒指雖創出今次反彈市的日中和收市新高，但觀望氣氛頗為濃厚。恒指收9971，微升6點，係連續第7日上升，但成交就縮到落去56億元。大市短期看好，但動力不足，須待有近百億元的大成交配合，才能破關而上。
升降指數轉弱，呢幾日大市雖升，但下跌股數都比上升股為多，市場做住藍籌係主要原因。所以，呢一輪，重可以躋身上升榜嘅股份，就必然「有料到」，正如本欄早前推介過嘅葉氏化工（408），就高收1.24元，升8仙；另外隻利來控股（221）就收0.345元，升1仙。
葉氏上周宣布佳績，股價急升上1.26元才出現調整，前日落到1.12元後回升，形成旗形，噚日再破位而上，以量度升幅計，短期上升目標可見1.5元。03年度（3月底止），葉氏每股盈利估計25仙，派息9仙，即使股價升上1.5元，預測PE和息率有6倍和6厘，重係好吸引。至於利來聽聞未來幾日會有動作，股價可向4字頭推進。
佐丹奴（709）有見底回升之勢，高收3.125元，升7.5仙，剛好突破由5月初伸延的下降軌，而50日線則在3.175元水平，只要有大成交（超過600萬股）配合破位而上，中期升勢即可確認。
上月底，佐丹奴宣布截至今年9月底止的9個月業績，營業額上升2.2%（上半年升1%），整體毛利率46%，較中期的47.3%為低，主要是受季節影響，成衣零售公司一般在年初及年底的毛利率較高。集團中期獲利1.94億元，估計全年4.2億元，每股盈利29.3仙，預測PE10.6倍，息率約3厘。
今年5月初，佐丹奴股價曾高見5.7元，之後回落到10月初的2.8元後橫行整固，形成雙底，若反彈前跌浪的0.382，可重上3.9元，而雙底頸線在3.4元，破位後量度上升目標為4.0元。
富昌國際（916）見有異動，升上4.6仙後回收4.3仙，有一個位進帳，成交亦大增至逾5100萬股。富昌在今年5月時曾見過18仙，現時已大幅回落，睇噚日個勢，似乎已見底，大跌後例有反彈，短線好大機會可升番上5、6仙水平。
郭兆誠