做人最怕改壞名，即如做外滙，如果你個名有個「書」字，睇怕好難有人請；但係除咗自己個名，老細個名同法官個名原來都好重要，好似霆鋒，碰正個法官叫「衛以寬」，待人以寬嘛，當然唔使坐監啦。
電盈員工就冇咁好彩，噚日又有五百幾人失業。冇法啦，佢哋個營運總監麥柏喬，叫做Butcher，講到明係「屠夫」，點會唔死得人多？咁都未算，Butcher個老細李澤楷，英文譯名叫TzarKai，廣東人個澤字好少譯做Tzar，呢個「沙皇」，又點會介意阿「屠夫」落重手呢？
至於電盈小股東，一樣好唔安心，事關新成立去安頓三千夥計之新公司，竟然叫做Cascade，乜嘢係Cascade？就係大瀑布，一睇就諗起一瀉千里，你話得唔得人驚？
傳真︰2623-9278
電郵︰