大機構聘請新人，引來大量大學畢業生申請，負責其事嘅總監L一睇啲申請表，見到女多男少；公司入邊，佢嘅部門已經幾乎係女性天下，總監L身為男士，認為咁樣唔夠「性別平衡」，於是指示手下：「第一次面試之時，對男仔手鬆啲，等多啲男仔有secondinterview機會！」好嘞，到咗第二次面試，男士比例係多咗啲，但見完之後，篩剩嘅又係女性佔絕大多數，卒之最後請咗八個人，七個係女仔。
總監L對左丁山講：「香港男仔發生咗乜嘢事呀？講說話，無論中英文水平，或者專業及時事常識，都係差過女仔嘅！」女勝於男，自小學已經係咁，中學會考成績又係女士叻，於是大學裏陰盛陽衰。入到大學嘅男學生，應該都唔曳啦，點解見工時又係處於劣風？總監L話：「睇怕啲香港男學生就嚟要向胡紅玉求救，要求給予男士平等就業機會！」
問總監L：「唔計男女性別，邊間大學嘅學生水平好啲？」哈，總監L唔肯講噃，話怕惹人誤會喎，但佢就話在佢所見嘅（面試）學生當中，港大學生用英語講專業知識，表現最好。奇怪嘅係，佢所見嘅港大生，對時事常識認知甚為水皮，廖秀冬係邊個都唔知。總監L發現咗一條縮短面試時間嘅方法，就係問：「廖秀冬最近言論對我哋公司有乜影響？」唔識，第二條問：「葉澍堃……？」又唔識，再問：「唐英年……」三條都唔識答，就多謝佢申請，面試為時只不過幾分鐘。