我對韓國女人的印象是，一定要化妝才見人，精緻的眼眉、紅紅的嘴唇及近吋厚的粉底。估不到入到烏煙瘴氣、不見天日的廚房，都見行年五十有八的大廚趙竹順Set行頭化濃妝，熊熊烈火旁炒餸做飯！原來這叫做禮貌，失敬失敬！
記者：梁佩芬 攝影：黃子偉
現代女性在韓國社會的身份已提升不少，但九成多韓國餐廳都以女廚師為核心，就算男人都覺得只有女廚師才能做出最傳統菜式，由自製醬汁、前菜、拋鑊炒菜，都由一雙巧手包辦。
我認識的趙竹順，二十三歲學廚，曾在多間韓國餐廳做主廚，懂簡單的廣東話，她說：「近二十年嚟，韓國開始多咗唔少廚藝學校，唔少男仔都學廚，反而女仔對呢行唔感興趣，但仍然有好多好似我一樣有多年做菜經驗嘅女廚師，要做一手好菜畀人客外，重要肩負保留做傳統韓菜精髓嘅責任。」
她很鼓勵男生入廚，但說到自己三子女時，就感歎道：
「大仔重好古老，唔肯入廚房；兩個女更加對廚師工作毫無興趣！」
要仔女繼承衣鉢，看來甚艱難！
去到韓國餐廳，不妨講番兩句韓文同Waitress姐姐混熟啲，話唔定會……
燜豆腐$80
做豆腐最複雜，要燜到入味又不會稀爛，加上醬汁辣度十足，用葱、豉油、麻油及辣醬製造，嗜辣的我，不消一會就成碟食晒！
牛肋骨$180/2條
韓國燒烤最多吃牛肋骨，先用甜醬汁醃製數天，造成肉不肥又嫩滑，侍應姐姐幫你烤時，會切到細細塊，燒約兩分鐘就食得。
雜菜撈田螺$180
田螺肉爽腍又彈牙，配上大量青瓜絲、芝麻葉、洋葱、紅蘿蔔、西洋菜，再用辣醬撈韓國幼麵即可食用，雖是冷盤，但很辣，食到出晒汗。
趙竹順工作的餐廳，在韓國已有六十多年歷史，到現在都是女人當家做主，由內至外，上至下都是女人。香港不少韓國餐廳都未必起用女性做大廚，但總經理金明淑說：「男人哪會做菜！何況要做出幾百年嘅菜式，只有我哋代代相傳，有數十年嘅功力，先至可以做到精巧細緻嘅韓國菜，客人都會感受到嗰種傳統情懷！」
勿以為活在大男人下的女人都惟命是從，話說正想拍攝二廚的工作情況，她二話不說就大力放下手頭工作，再「YoYo」聲與經理說死不上鏡，怒氣衝着我而來……好惡呀！但過了一陣子，當我問她有關韓菜問題時，她居然用溫柔的聲線夾雜不純正的廣東話解釋給我知，更親自炮製午餐，給下午四點還未食晏的我和攝影師享用。頓時間，明白到為甚麼韓菜的醬汁不是辣就是甜，你看做菜那位就略知一二啦！
阿里朗韓國餐廳
電話：25063298
地址：銅鑼灣時代廣場食通天1105店