嗱嗱嗱，唔係我求大俠吹水唔抹嘴，噚日我話見到國際足協公布嘅世界足球先生候選名單，只係得施丹、朗拿度及簡尼三個，就真係擰晒頭！一日之後歐洲足球先生候選名單亦都出咗，「哨牙度」亦榜上有名，阿仙奴前鋒亨利反應好激，直頭表示唔想見到朗拿度攞呢個獎！
亨利同我求大俠英雄所見略同，相信並唔係因為呢位法國前鋒同前世界足球先生朗拿度有乜牙齒印，佢嘅論點亦同我求大俠噚日講嘅差唔多，就係應該由全年都有傑出表現嘅球員，好似拜仁嘅波勒、皇馬嘅卡洛斯及魯爾等人爭呢個獎。
講開呢個由法國足球雜誌頒發嘅獎，五十位候選球員當中，有薛琦鉉及稻本潤一兩位亞洲球員在內，唔知幾時先可以見到李鐵、孫繼海等中國球員有份候選呢？
自從姚明喺對湖人時攞咗二十分後，國內傳媒就不斷勁吹巴克利將要履行佢嘅承諾，錫姚明個屁股。但係我求大俠記得好清楚，巴克利當時只係話，如果姚明可以喺十一月十號對勇士攞到十九分，佢就立即錫姚明個屁股，而唔係話全季。巴克利份人雖然成日口不擇言，但係佢面懵心精，點會咁蠢亂噏一通，要自己當眾出醜咁笨！
好多球會都怕咗嗰啲國際賽期，因為班球星踢完返嚟，可能踢唔番之前水準。不過呢兩日嘅國際賽期時近年尾，好多球會之前嘅放人次數已達到國際足協嘅標準，所以呢次有啲球會就好似多蒙特咁，可以留住真高拿及羅斯基等主將，踢周末嘅聯賽。波友想到時捧場捧得醒啲，就要昅實各支國家隊出場陣容，或者我
國際足協有例，球員拒絕國家隊嘅徵召，該國足總有權申請該球員喺球會賽事停賽兩場。法國足總同埋安歷卡最近就為大家演活呢條例，但呢幕鬧劇重有個主角，就係安歷卡效力嘅球會曼城。𠵱家曼城就Check到，原來法國足總根本就冇喺比賽進行十五日之前徵召過佢，所以安歷卡有權唔踢。我求大俠認為法國足總呢次真係自己攞嚟瘀，而安歷卡喺國家隊嘅前途睇嚟亦冇乜希望，係咁先嗰隻！
自從將李鐵借到愛華頓之後，波導戰鬥隊喺中國甲A聯賽總算收到宣傳之效，但係球會早前中國足協盃決賽輸畀青島海牛爆發餘波，俾球員踢爆半年冇糧出，隊長兼國腳肇俊哲企出嚟為隊友討個公道。據我求大俠所知，遼寧同意波導冠名嘅贊助費應有數千萬人民幣，話晒球員都係打工仔啫，半年冇糧出真係幫唔落喎！
世界盃已經過咗差不多成五個月，我求大俠一直都有留意中國國家隊新教練人選情況，真係好似走馬燈咁轉來轉去，米歇爾、前葡萄牙國家隊教練高爾奧、杜斯亞，最近又話七十年代荷蘭名將海恩都有機會。咁究竟幾時先有定案？為下屆世界盃，嚴選合適教練當然係好事，但早啲決定就有更多時間準備，總好過猶豫不決。
逢周一至周五見報