港燈早排俾班地產商、議員同政府聯手迫佢減電費，搞到副主席霍建寧出嚟大鬧同行「牟取暴利」，但係件事始終要諗個方法收科。八方收到料，話港燈高層左度右度，所謂眾怒難犯，𠵱家諗住都係唔加電費，甚至減都唔奇。
究竟點解可以由加電費、變唔加電費、甚至減呢？高人同八方講，呢樣就係會計魔力！由於港燈百分之十三點五准許利潤，係用投資作計算基礎，聽聞港燈內部學咗政府嗰招，已經計緊有乜工程可以拖吓先，咁投資細咗，就算唔加價都可以賺足百分之十三點五，再加埋港燈有成五億發展基金，如果賺唔夠數，呢五億重可以撥番入公司收入帳，咁就可以唔加費，又可以同股東交代。
但係中電就會好頭痕，因為中電賺又賺多過港燈，發展基金有成三十幾億；若果港燈唔加電費，怕且中電再派優惠都頂唔住減價壓力！
傳真︰2623-9278
電郵︰