7月，政府推行「優閒垂釣」計劃，准許魚排向公眾開放。於是，有水上居民立即將本身殘舊的魚排改裝，提供魚具，標榜24小時任釣任食任拎，希望闢出一條賺錢門路；亦有另一類人索性買下整個魚排作水上行宮，逢假日一家大細在魚排過夜，嘗釣魚樂之餘，更可與大自然全接觸。一時間，個個變晒釣魚郎！
記者：陳漢榮
攝影：陳盛臣、陳子良
模特兒：Lydia、Pat
西貢榕樹澳三面環山，風平浪靜，好適合出海釣魚，玩魚排釣魚最啱。從小碼頭乘快艇，不用5分鐘就置身魚排，看似危危乎的木板縱橫交錯，一踏發覺比想像中穩陣。魚排上，只得簡簡單單一間鐵皮屋、流動洗手間、木條欄柵，正中央擺放枱櫈，在此垂釣兼即食海上鮮，無疑好有Mood，但是否安全？「魚排有政府發嘅『在魚類養殖區內進行優閒垂釣的試驗計劃同意書』、公證行證書，證明魚排安全，適合玩魚排釣魚。」釣魚樂的魚排排主老楊說。但亦有不少人買個魚排回來自得其樂。
一家大細體驗大自然
擁有私人魚排的Ringo，半年前以公司名義購入：「透過朋友關係，我用$55,000頂咗呢個魚排，起咗兩間鐵皮屋、維修浮桶、排網、加圍柵、買快艇，使咗$200,000左右。」如此花費，值得嗎？「絕對值得！𠵱家一有假期，一家大細同親朋戚友必到，釣吓魚、吹吓水、望吓景、揸快艇到隔籬沙灘玩，享受吓天倫樂，好Relax！我鍾意呼吸新鮮空氣，唔想啲仔女淨係沉迷上網打機或者物質生活，得閒帶佢哋出海，上魚排教佢哋釣魚，上釣嘅魚我一定要佢哋放生，其實只想佢哋接觸吓大自然啫。」
1.釣海魚
小朋友最喜歡釣海魚，自己鈎餌、放絲，縱然上釣的多是細細條的雞泡魚、梳羅魚，已教他們樂足半天。
2.撈水母
拋下魚排，小朋友拿起魚網在排內撈兩撈，原來他們在撈水母。
3.採青口
黃太也沒閒着，穿上手套，採黏在浮桶邊的青口，10分鐘不夠已有50多隻，即採即蒸，極鮮美。
4.食海鮮
小朋友喊餓，本身是釣友的Ringo不收排網，二話不說拋絲放餌，兩條至少8両重的火點上釣，讓一眾親朋戚友大快朵頤。
頂手魚排靠兜搭
由於政府不再發新魚排牌照，想購買私人魚排，只有轉讓一途，Ringo說：「上漁農署搞手續，轉名手續費$180，年費每平方米$7.8。持牌人必須擁有牌照兩年或以上，方可轉讓。如果真係想頂手嘅話，可以逐個魚排兜搭，榕樹澳其實有好多排主都想放盤，有心就碰吓運氣啦！」
兩手空空去釣魚24小時恭候
釣魚最煩人的是要大費周章準備魚具與魚餌，排主老楊把魚排開放給釣魚發燒友之餘，為方便Walk-in客，更是24小時營業。「我知好多後生仔會一時興起，話嚟就嚟，得，一粒鐘前電話預約就得嘞；多數人會自備魚具入嚟，無嘅話都唔緊要，二三十個手排仔、十支八支魚竿、沙蟲魚餌，呢度有得供應。」
冬季將至，有甚麼魚可釣？「魚排裏面有紅鮪、烏頭、泥鯭、沙鯭，即釣即蒸即食，啲魚食唔晒可以攞走，不過嚟得呢度玩，梗係一心釣海魚啦，𠵱家係黃腳鱲同黑鱲產卵期，最易上釣，條條坐底半斤重！技術好嘅話，分分鐘釣到石斑仔同蟹，咁先有滿足感嘛！」
魚又多又蠢10分鐘上釣
模特兒Lydia釣得異常興奮：「我都唔識釣魚嘅，但呢度啲魚又多又蠢，無難度！放絲唔夠10分鐘就有條黑鱲上釣，好過癮呀！」Pat也有不俗收穫，半小時內釣到泥鯭、沙鯭、黃腳鱲各1條。
魚穫太多放血再打包
老楊充當賣魚佬，快刀生劏Pat與Lydia的戰利品：「你釣得多又食唔晒，啲魚我會幫你放血，任你打包拎走。」
香噴噴的海鮮上枱，只用豉油薑蔥清蒸，難得的鮮味，動筷，不消一刻只剩一棚魚骨。
免扯你落水 3呎龍躉餵得唔釣得
魚排內唯獨龍躉不可釣，老楊解釋：「我有約120條龍躉，一來係貴價貨，唔釣得；二來無專業用魚具根本釣唔到，用普通手絲排釣龍躉，分分鐘扯埋你落海。」釣不得，但餵得，老楊提供魚餌，任餵唔嬲。
玩到攰，可以入鐵皮屋唞唞，歎番罐汽水，邊吹海風唱K，感覺超爽。
不怕你三分鐘熱度，釣魚釣到悶，可以上拍在魚排旁的遊艇打麻雀、唱K，艇上老早備好燒烤食物，任燒任食，自助BBQ，燒魚一樣過癮。
小資料
魚排名：釣魚樂
地點：西貢榕樹澳
收費：淨釣每位$80，包遊艇燒烤每位$138
電話：95347491/26974185 淨釣1小時前預約，包遊艇1日前預約
交通：地鐵坑口站交通交滙處乘101專線小巴到西貢碼頭，轉的士直達榕樹澳碼頭（$40有找），有快艇接載你往返魚排