冇跟到美股回落，港股仍升44點，和黃（013）收51.75元，有75仙進帳，升幅1.5%，原來已經係最大升幅嘅大藍籌。
恒指由跌63點變升44點，似乎意味個市勢係要向上，和黃做先鋒，有機會升破上月52元高位，然後向上挑戰8月份56.50元高位。搵米對象和黃Call輪9518，只升得2仙，升得未夠，明年2月到期，現價53仙，溢價6.1%，槓桿率9.8倍，數據唔錯。和黃升到56.50元，9518大概會見78仙。
太古A（019）曾經有勢，最高32.80元，收32.40元，升30仙。太ACall輪9475未跟得貼，只升半仙，收28仙。9475最近個幾禮拜，交投轉熱，炒家加入炒上炒落，正股偏低，隻輪要昅多兩眼，明年5月到期，溢價10.1%，槓桿率11.6倍，咁嘅槓桿率，好有爆炸力。
滙豐（005）同恒生（011）同升50仙，滙豐由低位升上，恐怕上便水位有限，不如恒生。恒生收86元，呢排喺85元上下擺動，已有個幾月，由滙豐帶動，加上年底多數炒銀行股，恒生有機會上試89.50元。搵恒生Call輪埋手，得隻9402，現價35仙，溢價唔高，槓桿率24.6倍，爆炸力遠在9475之上。
章盛