英國皇室每年都會揀一套戲作為皇室御演，近年有幸被睇中嘅影片包括《星戰前傳之魅影危機》同《聖誕怪傑》，而今年喺倫敦皇家阿爾拔堂搞盛大首映禮嘅新片，就係第二十部占士邦電影《新鐵金剛之不日殺機》。為咗唔想失禮英女皇，個個有份出席嘅嘉賓都着到鬼火咁靚，絕對係一個星光熠熠嘅盛會。
前晚有份睇首映嘅嘉賓，自然唔少得《不日殺機》一班台前幕後啦，當中包括占士邦皮雅斯布士南（PierceBrosnan）、兩位邦女郎荷爾芭莉（HalleBerry）同羅莎蒙德派克（RosamundPike）。
最特別嘅係過往曾經做過鐵金剛嘅三位男星佐治拉辛比（GeorgeLazenby）、羅渣摩亞（RogerMoore）同鐵摩達頓（TimothyDalton）都有出席呢次盛會。
不過三位老牌鐵金剛始終敵唔過歲月嘅摧殘，佢哋都老咗好多，第二代占士邦佐治重成頭白頭髮！其實四代占士邦可以聚首一堂已經好難得，美中不足嘅就係元祖級鐵金剛辛康納利（SeanConnery）因為喺布拉格趕戲，所以嚟唔到，連我羅拉都覺得有啲失望。