近排大市氣氛好咗，連續有幾隻股仔都炒得起，搞到唔少炒家跟風。
龍發製藥（2898）將於下周一公布中期業績，成班炒家再出現，似想借勢炒一轉。龍發9月初以每股0.34元上市，股價旋即炒上0.50元樓上，可惜當時氣氛唔就，側聞成班大陸炒家都散唔到貨，隻股在0.50元水平徘徊，而成交亦細咗好多。
不過，近排隻股成交明顯增加，股價噚日亦發力，大升6.9％，收0.62元，為上市以來新高，成交金額增至431萬元，睇勢似係想做嘢。
新股上市首次公布業績，通常唔會太過走樣，所以炒業績呢個理由唔算太牽強。早排有好幾隻股份，例如葉氏化工（408）亦係炒業績概念，追炒可以執到多少，所以今次小初都唔敢睇小龍發。
另外，掛咗牌兩日嘅美蘭機場（357），股價雖然升咗唔少，但經紀黃話有班芬佬買緊貨，所以應該重有得去。
慕容小初