FIFA日前公布咗今年世界足球先生三個候選人，我求大俠睇倒名單就擰擰頭，事關簡尼、朗拿度同施丹全部係名氣馬，反而一啲真係有表現嘅球員就連影都冇。
朗拿度雖幫巴西攞第五次世界盃，但佢上屆喺國米係攞零分；簡尼佢喺今夏世界盃真係踢到出神入化，但弊在上屆幫唔到拜仁攞獎；而施丹上屆除咗喺歐冠盃有啲表現，喺西甲聯同世界盃就冇乜料到。
咁都未算，最慘就係三位今屆都打得唔好，朗拿度重承認日前對皇蘇場波係佢足球生涯其中一場劣作。
今年打得好過佢哋嘅大有人在，好似法國韋拉同德國波勒咁；可惜FIFA崇尚名牌，唔似歐洲足協咁有深度，嗰班打得好嘅球員想攞獎，要寄望歐洲足球先生選舉嘞！
列斯主席列斯杜爾響記者會上為領隊雲拿保斯護短，話隊波最近表現不濟，唔關雲拿保斯事，因老雲未上任前隊波已經沉淪喎！我求大俠明白列斯杜爾呢番說話等於向老雲派「定心丸」，不過將責任推晒落去前領隊奧拉利身上，就真係不敢恭維，話晒奧拉利當年都帶過列斯打入歐冠盃四強，威過，念下舊情好喎！
「黑雙煞」之一嘅約基前度女友佐敦又換畫，今次男主角係前利物浦領隊杜格利殊個仔保羅，最近就有人見到佢兩個響夜店有親熱舉動。寄語𠵱家踢緊乙組隊黑池嘅保羅仔醒定啲，約基嗰陣就係因為同佐敦搭上，後來搞到足球事業一落千丈，如果你又係咁，實激死你老竇。
重記唔記得英超聯伯明翰主場對維拉時，走入球場嘲弄維拉門將安高文嗰條友呀？呢個叫夏巴嘅伯明翰球迷，之前已被伯明翰會方禁制入場六年，最近重被當地法院判監四個月㖭！殺一儆百，如果再學埋意大利球員工會嗰邊最近提出嘅新方案，只要有球會發生包括球迷鬧事，就威脅成個聯賽停半年嘅話，相信更有阻嚇力。
紐約人噚日對活塞時，差啲寫下球會史上最差嘅開季戰績，好彩臨尾力保勝果。最近好多輿論都直插史比維爾，指佢係紐約人失敗嘅罪魁，其實隊中另一球星侯斯頓比史比維爾更應該鬧，佢今季嘅表現同佢個張一億美元嘅合約根本正反比，侯斯頓可以話係大幅貶值，紐約人今季成績咁差佢更加應該孭飛。