九九年因違反美國監管令而再度入獄的「哈佛大騎樓」鍾慧儀，身負百萬巨債，出獄至今三年未有露面，但大前晚「大騎樓」竟在港重現江湖。現年三十二歲的她，據悉變得白淨和纖瘦，脫胎換骨。
九二年以假信用卡在美國百貨公司行騙被判入獄的「哈佛大騎樓」鍾慧儀，因出獄後擅自離境，違反監管令而遭美國政府通緝，事件在九八年遭香港傳媒踢爆後，鍾慧儀不但遭無綫即時終止藝員合約，就連她在九六年奪得的國際華裔小姐季軍名銜亦被褫奪。其後鍾慧儀毅然返美自動投案，並即時入獄半年，而她在九九年九月出獄後亦從此銷聲匿迹。
但據本報接獲消息，人間蒸發了足足三年的鍾慧儀，近日再現江湖，重返香港大展拳腳。而一度與鍾慧儀十分友好卻慘遭拖欠二十萬元的湯盈盈，原來也接獲鍾慧儀已返港的消息。湯盈盈前晚在電話中說：「其實個幾兩個月前，我已經聽過話佢返咗嚟，但我就一直未見過佢，佢亦冇同我聯絡。噚晚係王賢誌見到佢，然後話畀我知嘅，我聽到都覺得幾突然，因為唔單止係我，佢喺香港重欠好多人錢，佢今次返得嚟，都幾犀利。」
記者問湯盈盈可會向鍾慧儀追討欠債時，湯盈盈無奈地說：「佢有心搵我嘅話，自然會call我，我個手提電話號碼咁多年一直冇改過，最緊要係對得住自己良心。」
若將來鍾慧儀主動清還債務，她可會原諒對方？湯盈盈不置可否地說：「佢當年咁對我，我真係好hurt，唔係佢還番啲錢畀我，就可以當乜事都冇發生過，我相信原諒佢會係一個幾難嘅過程，無論點都好，希望佢今次返嚟會做番個好人啦！」
至於大前晚（十七日）在尖沙嘴金域假日酒店coffeeshop與鍾慧儀碰個正着的王賢誌，前晚在電話中接受記者訪問時，形容鍾慧儀樣貌較以前漂亮，身材亦纖瘦了不少。
王賢誌：「噚晚（即前晚）九點鐘左右，我喺尖沙嘴HolidayInn間coffeeshop見到佢，雖然佢白咗、瘦咗又靚咗，但我認人一向好叻，有九成九機會唔會認錯。佢當時大約同四、五個竹升仔、竹升妹一齊入coffeeshop食buffet，鍾慧儀一見到我，都即時窒咗一窒，然後扮到好似唔識我咁，揀到最遠最遠張枱嚟坐，而且佢重要坐喺有條柱遮住嗰個位，慌死俾人見到咁樣。」
記者問王賢誌可有上前跟鍾慧儀打招呼時，王賢誌說：「冇錯我哋係曾經相熟，但見佢咁嘅反應，人哋唔想同我打招呼，見到都當唔識咁，唔通我重走埋去咩！」
據知，九九年偷偷地返美的鍾慧儀，在港拖欠的債務逾百萬元，若她不是有十足把握清還債務，應不會貿然返回香港這個彈丸之地罷。
採訪：戴彩煥