經濟更唔好都要拍拖，阿倫和阿茵這對恩愛情侶並未因為經濟差而減少出街，相反四出尋找着數嘢食成為生活樂趣之一，最近他們找到幾間食肆以$1作為招徠，提供多款$1菜式，時段包括午市、晚飯，當中有雞、蝦、蟹等，選擇多多，但要注意一些額外的雜費，例如茶芥、醬油等等的費用，免得偷雞唔到蝕揸米。
記者：陸伊琳 攝影：周旭文、陳盛臣
位於旺角的倫敦大酒樓，晚市小菜推出四款「一蚊有得揀」菜式，當中包括一蚊一隻雞、一毫子隻百花釀蟹箝、一蚊両灼蝦及一蚊碟燒腩肉，每次限揀一款優惠。
免費薑茸唔呃錢
雖然有頗多選擇，但當中梗係以雞最受歡迎，事關原價每隻要成$120，另送薑茸一碟，不要少看這碟薑茸，有些「老實商人」收就收一蚊一隻雞，但薑茸每碟分分鐘收你二、三十蚊，最後差不多用回正價來食隻雞。至於百花釀蟹箝每人限叫一隻，而燒腩肉兩至四位可叫一碟；五位或以上可品嘗兩碟，灼蝦每位最多限叫四両。
兩至四位可以優惠價$0.5叫半隻雞，而五位或以上就可享有一蚊一隻雞優惠，另送上一碟薑茸，其後加薑茸每碟$10。
香脆的百花釀蟹箝每人限叫一隻，並不飽肚，不合兩個人撐枱腳之選，但一毫子仍是平得很誇張。
兩至四位可以優惠價$1叫一碟，而五位或以上叫兩碟。
阿倫和阿茵點睇：
晚市食小菜嘅雜費只有茶芥，每位收$8，無其他醬油費，幾公道，綜合四款「一蚊有得揀」菜式，雞最抵食又飽肚，兩人限叫半隻雞，只係$0.5，再叫兩碗$7白飯，計埋加一服務費，埋單$33.6，真係平過去快餐店食。
倫敦大酒樓
電話：23329982
地址：旺角彌敦道612號好望角大廈
優惠時段：星期一至日6:00pm-11:30pm（只限堂食）
上酒樓飲夜茶在前幾年也興過一排，現在已少了許多，但仍想在晚上歎夜茶的朋友不妨到黃埔海霸燒鵝海鮮酒家，晚上八時半後夜茶大、中及小點一律$8.8，還有$1特價灌湯餃及多款$28特價小菜，提供多項選擇。不過要注意除了茶芥每位收$7及加一服務費外，還需付$10作泡菜費用，四位或以下收一碟錢；五至八位，需付兩碟錢；而九位或以上則收三碟錢。
午市時以特價$4.8一盅來吸引食客，晚市更是超特價$1，每人限叫一盅，即叫即蒸，灌湯餃內材料包括有瑤柱、蝦、竹笙、瘦肉等，大大隻沒有偷工減料。
阿倫和阿茵點睇：
材料十足，而且熱辣辣，啱晒我哋日頭做嘢唔得閒飲茶嘅人，不過雜費較多，泡菜要成10蚊碟。
海霸燒鵝海鮮酒家
電話：23303315
地址：黃埔花園船景街棕櫚苑4號地下
優惠時段：星期一至五8:30pm-12:00mn、星期六及日9:00pm-12:00mn
位於火車站側的紅磡國際都會新開的彩福海鮮酒家，平日午市以$1招牌蝦餃皇作招徠，蝦餃皇是用原隻鮮蝦製造，十分爽口，很有水準，難怪成了招牌點心，只可惜特價時段只在平日的午市，午市茶芥費用每位$6。
大大隻蝦餃皇，原隻鮮蝦製造，皮薄彈牙。四位或以下限叫一籠；五至八位可叫兩籠；九位或以上可叫三籠。
阿倫和阿茵點睇：
無將貨就價，原隻鮮蝦，味道口感好唔錯，但係優惠只喺平日午市供應，而且計過數都係一、兩個人食較為着數，每人可食多兩、三隻，如果四個人每人就只可分到一隻，到喉唔到肺。
彩福海鮮酒家
電話：27660886
地址：紅磡灣國際都會L8-858號舖
優惠時段：星期一至五11:45am-2:00pm