朱總來港，一方面訓勉中資高層要支持董建華，並呼籲不要將問題歸於董建華，但就將功勞歸於英國人。講真一句，香港的繁榮實際與英國人無大關係，主要是靠香港人自己努力創造，當中的經濟泡沫亦不是董建華炮製出來。
不過，董建華一上台就好心做壞事，刺破樓市泡沫，導致樓市崩塌，蒸發大部份港人財富，令經濟急速轉壞，則肯定關董建華事。樓市經過5年下跌，董建華先至使出9招撥亂反正，反應咁遲鈍，當然亦係佢嘅錯。阿董做足5年特苜，香港亦衰足5年，佢咁黑仔，俾人鬧亦係好正常。
深圳控股（604）噚日出現大手成交上板，達3500萬股，每股作價1.01元。黑客話，深控股價整固一段長時間後，突然出現大手成交，相信是開車前奏。睇嚟公司好快會公布分拆物流業務嘅具體計劃。
海油服務（2883）今日首日掛牌，據聞暗盤價造得頗為理想，高達1.80元，較招股定價1.68元為高。近期新股表現多數唔理想，但海油服務公開發售部份仍有17.7倍超購，反映本地散戶對此股頗為受落。據聞，包銷商唔會畀股價破底，散戶可能有幾個巴仙利潤落袋，點都好過放錢在銀行蝕息，故吸引不少散戶認購。不過，首日趁高沽貨嘅人亦可能唔少，所以追貨要睇車。
中電信（728）噚日回吐，跌1.3%，收報1.47元，守住招股價。朱總噚日直斥中電信不顧經濟形勢，趕在十六大前加價，又不與長途電話營辦商好好溝通。唔知朱總呢一番說話導致中電信市值損失幾多億呢？睇嚟中電信1.47元招股價，可能守唔穩。
阿虎